ބްރޯޑްކާސްޓިންގ ކޮމިޝަނަށް މުހަންމާ އާއި މުއާޒު އައްޔަނުކުރަން ރައީސް އެދިވަޑައިގެންފި

އިހަވަންދޫ ދާއިރާގެ ކުރީގެ މެންބަރު މުހައްމަދު އަބްދުﷲ (މުހަންމާ)

މޯލްޑިވްސް ބްރޯޑްކާސްޓިންގ ކޮމިޝަންގެ ހުސްވެފައިވާ ދެ މެންބަރުކަމުގެ މަޤާމަށް، އިހަވަންދޫ ދާއިރާގެ ކުރީގެ މެންބަރު މުހައްމަދު އަބްދުﷲ (މުހަންމާ) އާއި، ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ ތަރުޖަމާނުކަން ކުރެއްވި އިބްރާހީމް މުއާޒު އަލީ އައްޔަނުކުރެއްވުމަށް ރައީސް ޑރ. މުހައްމަދު މުއިއްޒު އެދިވަޑައިގެންފިއެވެ.

ބްރޯޑްކޮމްގެ ދެ މަޤާމު ހުސްވެފައި ވަނީ އެ ކޮމިޝަންގެ ރައީސާއަކަށް ހުންނެވި މަރިޔަމް ވަހީދާއާއި މެންބަރު އަލީ ޔޫސުފްގެ ދައުރު މި މަހުގެ ފަހަކަށް ހަމަވުމާ ގުޅިގެންނެވެ. މި މަޤާމުތަކަށް ކުރިމަތިލުމަށް ހުޅުވާލި ފުރުސަތުގައި ޝަރުތު ހަމަވާ 12 ބޭފުޅުންގެ ނަންތައް ވަނީ ރައްޔިތުންގެ މަޖިލީހަށް ހުށަހަޅުއްވާފައެވެ.

މުހަންމާ އަކީ ފިލްމީ ދާއިރާއިން މަޤުބޫލުކަން ހޯދި، އަދި ފަހުން ސިޔާސީ ދާއިރާގައި ހަރަކާތްތެރިވި ބޭފުޅެކެވެ. އޭނާ ވަނީ ރައީސް ޔާމީންގެ ދައުރުގައި މަޖިލީހުގައި އިހަވަންދޫ ދާއިރާގެ މެންބަރުކަން ކުރައްވާފައެވެ.

މުއާޒަކީ ރައީސް އޮފީހުގެ ތަރުޖަމާނެއްގެ ގޮތުގައި މަސައްކަތްކުރެއްވުމުގެ ކުރިން ދައުލަތުގެ މީޑިއާގައި މަސައްކަތްކުރެއްވި ބޭފުޅެކެވެ. އޭނާ ވަނީ ކުރީގެ ނާއިބު ރައީސް އަހްމަދު އަދީބު އިސްކޮށް ހުންނަވައިގެން އުފެއްދެވި މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ)ގެ ނައިބު ރައީސްކަންވެސް ކުރައްވާފައެވެ. އަދި 2023 ގެ ރިޔާސީ އިންތިޚާބާ ދިމާކޮށް އެމްޑީޕީއަށް ސޮއިކުރައްވާފައިވެއެވެ.

މޯލްޑިވްސް ބްރޯޑްކާސްޓިންގ ކޮމިޝަން