މާލޭގައި ހިނގި އަލިފާނުގެ ހާދިސާއާ ގުޅިގެން 50 އަށްވުރެ ގިނަ މީހުން ސޯޝަލް ސެންޓަރަށް ގެންދަނީ

މާލޭގައި މިއަދު ހިނގި އަލިފާނުގެ ހާދިސާއާ ގުޅިގެން، އެ ސަރަހައްދުގައި ދިރިއުޅޭ 50 އަށްވުރެ ގިނަ މީހުން ސޯޝަލް ސެންޓަރަށް ގެންދިއުމުގެ މަސައްކަތް ކުރަމުންދާ ކަމަށް ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ) އިން މިއަދު ވަނީ ހާމަކޮށްފައެވެ.

އެންޑީއެމްއޭގެ ޗީފް އެގްޒެކެޓިވް ހިސާން ހަސަން ޕީއެސްއެމްގެ ނިއުސްއަށް ދެއްވި މަޢުލޫމާތުގައި ވިދާޅުވި ގޮތުގައި، މި ހާދިސާއާ ގުޅިގެން ގުޅިގެން އިވެކުއޭޝަން ސެންޓަރެއް ވަނީ ޤާއިމްކޮށްފައެވެ. އަދި އެ ސަރަހައްދުގައި ދިރިއުޅޭ ފަރާތްތަކުގެ ތެރެއިން 50 އަށްވުރެ ގިނަ މީހުން ސޯޝަލް ސެންޓަރަށް ގެންދިއުމުގެ މަސައްކަތް މިހާރު ކުރިއަށްދާ ކަމަށް އޭނާ ވިދާޅުވިއެވެ.

އެންޑީއެމްއޭއިން އަންދާޒާކުރާ ގޮތުގައި، މި ހާދިސާއާ ގުޅިގެން ސޯޝަލް ސެންޓަރަށް ގެންދެވޭ ފަރާތްތަކުން 4 އާއި 6 ގަޑިއިރާ ދެމެދުގެ ވަގުތެއް އެތަނުގައި ހޭދަކުރަން ޖެހިދާނެއެވެ. އަދި އެތަނުގައި ތިބޭ މުއްދަތުގައި ކެއުމާއި ބުއިމުގެ ޚިދުމަތް ފޯރުކޮށްދޭނެ ކަމަށްވެސް އެންޑީއެމްއޭއިން ވަނީ ހާމަކޮށްފައެވެ.

މީގެ އިތުރުން، އަލިފާނުގެ ހާދިސާ ހިނގި ސަރަހައްދުގައި ހުރި އޮފީސްތަކާއި ސްކޫލްތައް ބަންދުކުރުމަށް ކަމާބެހޭ ފަރާތްތަކަށް އަންގާފައިވާ ކަމަށް ހިސާން ވިދާޅުވިއެވެ. މިގޮތަށް އަމަލުކުރަން ޖެހުނީ މިވަގުތު އެ ސަރަހައްދުގައި ދުމުގެ އަސަރު ވަރަށް ބޮޑަށް ހުރުމުގެ ސަބަބުން ކަމަށް އޭނާ ފާހަގަކުރެއްވިއެވެ.

އެންޑީއެމްއޭއިން ވަނީ ދުމުގެ އަސަރުކޮށްފައިވާ ނުވަތަ އެއްވެސް އެހީތެރިކަމެއް ބޭނުންވާ ފަރާތްތަކުން 115 އަށް ގުޅައިގެން އެހީތެރިކަން ހޯދުމަށް އިލްތިމާސްކޮށްފައެވެ. އަދި މީހުން ގެތަކަށް ބަދަލުކުރަން ޖެހޭ އަދަދު ފުރިހަމައަށް ދެނެގަތުމަށް އިތުރު ވަގުތު ނަގާނެ ކަމަށްވެސް އެންޑީއެމްއޭއިން ވަނީ ބުނެފައެވެ.