ޔޫކްރެއިންއަށް ހަތިޔާރާއި ފައިސާ ނުދޭނަން: ޓްރަމްޕް

ޔޫކްރެއިން ހަނގުރާމައަކީ ކޮށްގެންވާނެ ހަނގުރާމައެއް ނޫން ކަމަށާއި، އޭނާގެ ވެރިކަމެއްގައި ރަޝިއާއާ ކުރިމަތިލުމަށް ޔޫކްރެއިންއަށް ހަތިޔާރާއި ފައިސާ ނުދޭނެ ކަމަށް އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

އިންތިހާބީ ރައީސް ޓްރަންޕު މި ފަދައިން ވިދާޅުވެފައި ވަނީ ފްލޮރިޑާގައި ދެއްވި ބަޔާނެއްގައެވެ.

ޓްރަމްޕް ވިދާޅުވިގޮތުގައި އޭނާގެ ޓީމުން ރަޝިއާއާއި ޔޫކްރެއިންއާ ނުރަސްމީ މުއާމަލާތްތަކެއް ކޮށްފައިވާއިރު، ދެ ގައުމުވެސް އޮތީ އެއްބަސްވުމެއްގެ ދަށުން ހަނގުރާމަ ހުއްޓާލާ ގޮތަށެވެ. އަދި ހަނގުރާމަ ހުއްޓުމަށްފަހު ޔޫކްރެއިން އަލުން ބިނާކޮށް އާރާސްތު ކުރުމަށް ކޮންމެވެސް ވަރެއްގެ އެހީއެއް ދެވިދާނެ ކަމަށްވެސް އޭނާ ވިދާޅުވިއެވެ.

ޓްރަމްޕްގެ ޓީމުން ޔޫކްރެއިން ހަނގުރާމަ ހުއްޓުވުމަށްޓަކައި ރަޝިއާއެކު ޑީލެއް ހެދުމާބެހޭ ވާހަކަތަކެއް ގެންދަނީ އެ ދެ ގައުމާއެކު ނުރަސްމީކޮށް ދައްކަމުންނެވެ. ނަމަވެސް ވެރިކަމުގެ ހުވާކޮށް ރަސްމީކޮށް ވެރިކަމާ ހަވާލުވުމުގެ ކުރިން އެމެރިކާގެ ނަމުގައި މިފަދަ ކަންކަން ކުރުމަކީ އިންތިޚާބީ ރައީސަކަށް ގާނޫނު ތަންދޭ ކަމެއް ނޫނެވެ.

ރޮއިޓާސް އިން ބުނާގޮތުގައި ޓްރަމްޕްގެ ޑީލްގައި ހިމެނެނީ ރަޝިއާ ޔޫކްރެއިނުން ހިފާފައިވާ ބިންތައް ރަޝިއާއަށް ދިނުމާއި، ޔޫކްރެއިން ނޭޓޯއަށް ނުވައްދާނެކަމުގެ ޔަގީންކަން ރަޝިއާއަށް ދިނުމެވެ. މީގެ ބަދަލުގައި ޔޫކްރެއިންއަށް ގޯނާ ނުކުރާނެކަމުގެ ޔަގީންކަން ރަޝިއާއިން ދޭނެ ކަމަށާއި، ޔޫކްރެއިންގެ ބާކީހުރި ބިންތަކަށް ނޭޓޯއިން ޚާއްސަ އުސޫލެއްގެ ދަށުން ހިމާޔަތް ދޭނެ ކަމަށެވެ.

ޔޫރަޕްގެ ގައުމުތައް މި ޑީލްއާ ވަރަށް ދެކޮޅު ކަމަށް ރިޕޯޓުތައް ބުނެއެވެ. އެއީ މިއީ ރަޝިއާގެ އުދުވާނަށް އިނާމު ދިނުން ކަމަށް ބެލެވޭތީއެވެ. އަދި މިކަމުގެ ނަތީޖާއަކަށްވާނީ ރަޝިއާ ޔޫރަޕްގެ އެހެން ގައުމަކާ ދެކޮޅަށް ހަނގުރާމަ ފެށުން ކަމަށް ޔޫރަޕްގެ ގައުމުތަކުން ދެކޭކަމަށްވެސް ރިޕޯޓުތައް ބުނެއެވެ.