މާޅޮހު ކައުންސިލުން 492,867 ރުފިޔާ ގެއްލިފައިވާކަމަށް އޮޑިޓް ރިޕޯޓުން ހާމަވެއްޖެ

އއ. މާޅޮހު ކައުންސިލްގެ އޮޑިޓް ރިޕޯޓުން ދައްކާގޮތުގައި 2017 އަދި 2018 ވަނަ އަހަރު ކައުންސިލްގެ ބޭންކް އެކައުންޓުތަކުންނާއި ތިޖޫރީން ނަގާފައިވާ ފައިސާގެ ތެރެއިން 492,867 ރުފިޔާ ވަނީ ގެއްލިފައެވެ.

މި ރިޕޯޓު އާންމުކޮށްފައިވަނީ މިދިޔަ އާދިއްތަ ދުވަހުއެވެ.

ގެއްލުނު ފައިސާގެ ތެރޭގައި ހިމެނެނީ ބޭންކް އެކައުންޓުން ނަގާފައިވާ ފައިސާގެ ތެރެއިން ތިޖޫރީއަށް ނުވައްދައި ހުރި 255,584 ރުފިޔާއާއި، ކައުންސިލް އިދާރާގެ އެކި ބޭނުންތަކަށް ކަމަށް ބުނެ ލިޔެކިޔުންތައް އޮޅުވާލައިގެން ނަގާފައިވާ 112,500 ރުފިޔާއެވެ. މީގެ އިތުރުން މުސާރައިގެ ގޮތުގައި ދޭންޖެހޭ ވަރަށްވުރެ އިތުރަށް ނަގާފައިވާ 82,579 ރުފިޔާއާއި ބޭންކަށް ޖަމާކުރުމަށް ތިޖޫރީން ނަގާފައިވާ ފައިސާގެ ތެރެއިން ބޭންކަށް ޖަމާކޮށްފައިނުވާ 42,204 ރުފިޔާ ހިމެނެއެވެ.

އޮޑިޓް ރިޕޯޓުގައިވާ ގޮތުން، ކައުންސިލްގެ ކުރީގެ އެޑްމިން އޮފިސަރު ވަނީ ކައުންސިލްގެ ދެ ލައްކައެއްހާ ރުފިޔާ އަމިއްލަ ބޭނުމަށް ޚަރަދުކޮށްފައިވާ ކަމަށް އިއުތިރާފުވެފައެވެ. އަދި ބޭންކުން ފައިސާ ނަގަންޖެހޭ އަދަދަށްވުރެ އިތުރަށް ނެގުމަށް، އަމިއްލައަށް ލިޔެކިޔުންތައް ތައްޔާރުކޮށް، ޗެކުގައި ކައުންސިލްގެ އިސްވެރިންގެ ސޮއި އަމިއްލައަށް ކޮށްފައިވާ ކަމަށްވެސް އިއުތިރާފުވެފައިވެއެވެ.

މި މައްސަލައިގައި ކައުންސިލްގެ އިސްވެރިންގެ އިހުމާލު އޮތް ކަމަށްވެސް ރިޕޯޓުގައި ފާހަގަކޮށްފައިވެއެވެ. އަދި މި މައްސަލަ ތަހުގީގުކޮށް، މާލިއްޔަތު ގާނޫނާއި ގަވާއިދުގެ ދަށުން އިސްލާހީ ފިޔަވަޅު އެޅުމަށް ނަސޭހަތްދީ، ފިޔަވަޅު އެޅުމަށް އެ ރިޕޯޓުގައި ވަނީ އަންގާފައެވެ.