2034 ވޯލްޑް ކަޕް ސައުދީއަށް ލިބުމުން ރައީސް މުއިއްޒު މަރުޙަބާ ވިދާޅުވެއްޖެ

2034 ވަނަ އަހަރު ބޭއްވުމަށް ހަމަޖެހިފައިވާ ފީފާ ވޯލްޑް ކަޕްގެ ބިޑު ސައުދީ އަރަބިއްޔާއިން ކާމިޔާބުކުރުމާ ގުޅިގެން ރައީސް ޑރ. މުޙައްމަދު މުއިއްޒު އެ ގައުމަށް މަރުޙަބާ ވިދާޅުވެއްޖެއެވެ.

ރައީސްގެ މި މަރުޙަބާގެ މެސެޖު ހިއްސާ ކުރައްވާފައި ވަނީ އެކްސްގައި ކުރެއްވި ޕޯސްޓެއްގައެވެ.

ރައީސް މުއިއްޒު ވިދާޅުވީ މި ކާމިޔާބީއަކީ ބައިނަލްއަޤްވާމީ ދުނިޔޭގައި ސައުދީ އަރަބިއްޔާގެ މަޤްބޫލުކަމާއި ނުފޫޒު އިތުރުވަމުން އަންނަކަމުގެ ހެއްކެއް ކަމަށެވެ. އަދި މިއީ ހަމައެކަނި ސައުދީއަށް ލިބުނު ފަޚުރެއް ނޫން ކަމަށާއި، މުޅި އަރަބި ދުނިޔެއާއި އިސްލާމީ މުޖުތަމަޢުއަށްވެސް ލިބުނު ކާމިޔާބެއް ކަމުގައި ސިފަކުރެއްވިއެވެ.

ރައީސް މުއިއްޒު އުންމީދު ފާޅުކުރެއްވީ 2034 ވަނަ އަހަރުގެ ވޯލްޑް ކަޕަކީ ވާދަވެރި މުބާރާތެއްގެ އިތުރުން އެއްބައިވަންތަކަމާއި، ސަގާފީ ގުޅުމާއި، އައު އީޖާދުތައް ފެންނާނެ ވޯލްޑް ކަޕަކަށް ވާނެ ކަމަށެވެ.

2034 ވަނަ އަހަރުގެ ވޯލްޑް ކަޕް ހޯސްޓްކުރުމަކީ ސައުދީގެ ވަލީ އަހުދު މުޙައްމަދު ބިން ސަލްމާން އިސްނަންގަވައިގެން ހިންގަވާ އިޤްތިޞާދީ ސްޓްރެޓެޖީ "ވިޝަން 2030" ގެ ދަށުން ކަނޑައަޅާފައިވާ އެންމެ މުހިންމު އެއް ލަނޑުދަނޑިއެވެ. މި ވިޝަންގައި ހިމެނެނީ އެކި ސަގާފަތުގެ މުޖުތަމަޢުއެއް ބިނާކުރުމާއި، ހިންގުންތެރި އިޤްތިޞާދެއް ބިނާކުރުމާއި ކާމިޔާބަށް މަސައްކަތްކުރާ ގައުމެއް ބިނާކުރުމެވެ.

ސައުދީއަށް ވޯލްޑް ކަޕް ބާއްވަން ފުރުސަތު ލިބުމަކީ ކުރިން ވެސް ޔަޤީންވެފައި އޮތް ކަމެކެވެ. އެއީ ފީފާއިން ދިން ކުރު މުއްދަތުގެ ސަބަބުން އޮސްޓްރޭލިއާއިން ބިޑު ހުށަހެޅުމަށް އޮތް ޝައުޤުވެރިކަން ދޫކޮށްލުމާއެކު، އިތުރު ގައުމަކުން ކުރިމަތިނުލާތީ، އޮކްޓޯބަރު 2023 އިން ފެށިގެން ބިޑު ހުށަހެޅި ހަމައެކަނި ކެންޑިޑޭޓެއްގެ ގޮތުގައި އޮތީ ސައުދީ ކަމަށްވާތީއެވެ.