މީރާއަށް އަންދާޒާ ކުރި ވަރަށްވުރެ އިތުރު އާމްދަނީއެއް ލިބިއްޖެ

މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް މިދިޔަ ނޮވެމްބަރު މަހު ލިބުނު އާމްދަނީ، އަންދާޒާކުރި ވަރަށްވުރެ 19.7 އިންސައްތަ އިތުރުވެއްޖެ އެވެ.

މީރާއިން މިއަދު އާންމުކުރި ނޮވެމްބަރު މަހުގެ ޓެކްސް ހިސާބުތަކުން ދައްކާ ގޮތުގައި، އެ މުއްދަތުގައި މީރާއަށް 1.89 ބިލިއަން ރުފިޔާގެ އާމްދަނީ ލިބިފައިވެއެވެ. މީގެ ތެރޭގައި ޑޮލަރުން ލިބުނު 88.17 މިލިއަން ޑޮލަރުވެސް ހިމެނެއެވެ.

މިދިޔަ މަހު ލިބުނު އާމްދަނީ އިތުރުވެފައިވަނީ ރިސޯޓު ހަދަން ދިން ރަށްތަކުން ލިބުނު އިކުއިޒިޝަން ކޮސްޓް އަދި ކޮންވާޝަން ފީގެ ގޮތުގައި ލިބުނު އާމްދަނީ އިތުރުވުމުންނާއި، ޓީޖީއެސްޓީގެ ގޮތުގައި ލިބުނު އާމްދަނީ އިތުރުވުމުންނެވެ. މީގެ އިތުރުން، ލޭންޑް އިކުއިޒިޝަން އަދި ކޮންވާޝަންފީ އާއި ލީސް ޕީރިއަޑް އެކްސްޓެންޝަން ފީ ފަދަ އެއްފަހަރާ ބޮޑު އަދަދެއް ލިބޭ ފީތައް ދައްކާފައިވާތީ ވެސް މިދިޔަ މަހުގެ އާމްދަނީ އިތުރުވެފައިވާ ކަމަށް މީރާއިން ބުނެފައިވެއެވެ.

މި އަހަރުގެ ނޮވެމްބަރު މަހު ލިބުނު ޓެކްސް އާމްދަނީއަކީ އޭގެ ކުރީ އަހަރުގެ އެ މުއްދަތުގައި ލިބުނު ޓެކްސް އާމްދަނީއަށްވުރެ 13.2 އިންސައްތަ އިތުރު އަދަދެކެވެ. މީރާއިން ބުނާ ގޮތުގައި މިއަހަރުގެ ނޮވެމްބަރު މަހު ރާއްޖެ އައި ފަތުރުވެރިންގެ އަދަދު މިދިޔަ އަހަރުގެ އެ މުއްދަތަށްވުރެ 8.5 އިންސައްތަ އިތުރުވެފައިވުމަކީ ނި އަދަދު މަތިވުމުގެ އެއް ސަބަބެވެ.

މިދިޔަ މަހު މީރާއަށް އެންމެ ބޮޑު އާމްދަނީއެއް ލިބިފައިވަނީ ޖީއެސްޓީގެ ގޮތުގައެވެ. އެއީ 1 ބިލިއަން ރުފިޔާ ނުވަތަ ޖުމުލަ އާމްދަނީގެ 57.9 އިންސައްތައެވެ. ދެވަނައަށް އެންމެ ބޮޑު އާމްދަނީއެއް ލިބިފައިވަނީ ލޭންޑް އިކުއިޒިޝަން އެންޑް ކޮންވާޝަން ފީގެ ގޮތުގައެވެ. އެއީ 171 މިލިއަން ރުފިޔާ ނުވަތަ ޖުމުލަ އާމްދަނީގެ 9.1 އިންސައްތައެވެ.