ބެންކޮކާއި ދުބާއީން އާސަން ހިދުމަތް ދިނުމަށް އެއްބަސްވުމުގައި ސޮއިކޮށްފި

ޖެނުއަރީން ފަށައިގެން ބެންކޮކް އަދި ތައިލެންޑުން އާސަންދަ ލިބޭނެގޮތް ވަނީ ހަމަޖައްސާފައި --

އާސަންދަ ސްކީމުގެ ދަށުން ޚިދުމަތް ދިނުމަށް ޔޫއޭއީގެ ދުބާއީގެ ހޮސްޕިޓަލަކާއި ތައިލެންޑުގެ ބެންކޮކްގެ ދެ ހޮސްޕިޓަލަކާއެކު މިއަދު ސޮއިކޮށްފި އެވެ.

އާސަންދަ ކުންފުނިން ކުރި ޓްވީޓުގައި ބުނީ، އާސަންދަ ސްކީމުގެ ދަށުން ބޭސްފަރުވާ ހޯދަން ބަލިމީހުން ފޮނުވުމަށް ސޮއިކޮށްފައި ވަނީ ތައިލެންޑުގެ ދަ ވޯލްޑް މެޑިކަލް ހޮސްޕިޓަލް އަދި ތައިލެންޑުގެ ބެންކޮކްގެ ބެންކޮކް ހޮސްޕިޓަލާ އެކު ކަމަށެވެ. މީގެ އިތުރުން ޔޫއޭއީއިން މި ހިދުމަތް ދިނުމަށް ސޮއިކޮށްފައި ވަނީ ދުބާއީގެ ބުރްޖީލް މެޑިކަލް ސިޓީ އާއެކު ކަމަށް އާސަންދައިން ބުންޏެވެ.

އާސަންދައިން މަޢުލޫމާތު ދޭ ގޮތުގައި، މި އެއްބަސްވުންތަކުގެ ދަށުން އަންނަ އަހަރުގެ ޖެނުއަރީ މަހުގެ 15 އިން ފެށިގެން ކަނޑައެޅޭ އުސޫލެއްގެ ތެރެއިން މި ހޮސްޕިޓަލްތަކަށް ފަރުވާއަށް ފޮނުވަން ފަށާނެއެވެ.

މިހާރު އާސަންދަ ސްކީމްގެ ދަށުން ރާއްޖޭން ބޭރަށް ބޭސްފަރުވާއަށް ފޮނުވަމުންދަނީ އިންޑިއާ އާއި ސްރީލަންކާ އަށެވެ.

ރައީސް ޑރ މުޙައްމަދު މުއިއްޒު ވިދާޅުވެފައި ވަނީ ދުނިޔޭގައި އެންމެ ރަނގަޅު ބޭސްފަރުވާ ދޭ ކަމަށް ގިނަ ބަޔަކު ގަބޫލުކުރާ ޔޫއޭއީ އާއި ތައިލެންޑަށް އާސަންދަ ފުޅާ ކުރައްވާނެ ކަމަށެވެ.

ސަރުކާރުން ވަނީ އާސަންދައިގެ ދަށުން ޚިދުމަތް ލިބޭ ޤައުމުތައް އިތުރުކުރުމުގެ އިތުރުން މުޅި ނިޒާމުވެސް ހަރުދަނާ ކުރުމަށް ގިނަ މަސައްކަތްތަކެއް ފައްޓަވާފައެވެ. އަދި އާސަންދައިގެ ޚިދުމަތް ފުޅާކޮށް، މީގެކުރިން ނުކުރެވޭ ގިނަ ފަރުވާތަކެއް އަސަންދައިގެ ދަށުން ކުރެވޭނެ އިންތިޒާމްވެސް ސަރުކާރުންވަނީ ހަމަޖައްސަވާފަ އެވެ.

އާސަންދަ