ޖޫރިމަނާ ނުލާ ކަރަންޓު ބިލް ދެއްކޭ މުއްދަތު މި މަހުގެ ނިޔަލަށް ހަމަވާތީ، ހަނދާންކޮށްދީފި

ގޭބިސީތަކުގެ ފެން ބިލާއި ކަރަންޓް ބިލް، ނުދެއްކި ގިނަ ދުވަސް ވެގެން އަރާފައިވާ ޖޫރިމަނާ ފައިސާ މައާފްކޮށްދީ، ޖޫރިމަނާއާއި ނުލާ އެ ފައިސާ ދެއްކޭ މުއްދަތު މިމަހުގެ ނިޔަލަށް ހަމަވާނެ ކަން ސްޓެލްކޯއިން ހަނދާންކޮށްދީފި އެވެ.

އާންމުން މީސްމީހުން ދިރިއުޅޭ ގޭ ބިސީތަކުގެ ކަރަންޓާއި ފެން ބިލް ނުދެއްކި ގިނަ ދުވަސްވެގެން އަރާފައިވާ ޖޫރިމަނާތައް މާފުކޮށްދިނުމަށް ނިންމީ ރައީސް ޑރ. މުޙައްމަދު މުއިއްޒު އެވެ.

ސްޓެލްކޯއިން ބުނީ ރައީސްގެ އެ ނިންމެވުމާ އެއްގޮތަށް، އާންމު ދިރިއުޅުމަށް ބޭނުންކުރާ ހިދުމަތުގެ ކަރަންޓު ބިލު ތަކަށް ޖޫރިމަނާގެ ގޮތުގައި އަރާފައިވާ ފައިސާ މައާފުކޮށް، ޖޫރިމަނާއާއި ނުލާ ފައިސާ ދެއްކޭނެ އިންތިޒާމު ވާނީ މިދިޔަ އޭޕްރިލް މަހުގެ ފުރަތަމަ ދުވަހުން ފެށިގެން ހަމަޖެހިފައިވާ ކަމަށެވެ.

ޖޫރިމަނާ މައާފު ކުރަން ހަމަޖެހިފައި ވަނީ 2023 ގެ ނިޔަލަށް ނުދެއްކި ހުރި ބިލުތައް ކަމަށެވެ. މި ބިލް ތަކަށް އެއްފަހަރާ ނޫނީ ބަހާލައިގެން ވެސް ފައިސާ ދެއްކޭނެ އިންތިޒާމު ވަނީ ހަމަޖައްސާފަ އެވެ.

ކަރަންޓު ބިލު މައާފުކޮށްދީފައި ވަނީ އާންމު ދިރިއުޅުމަށް ބޭނުން ކުރާ ހިދުމަތުގެ ބިލު ތަކުގެ ތެރެއިން މިދިޔަ އަހަރުގެ ޑިސެމްބަރު 31، ގެ ނިޔަލަށް ހުރި ކަރަންޓު ބިލުތަކުގެ ތެރެއިން ފައިސާ ނުދައްކާ ބިލު ތަކަށެވެ.

ޖޫރިމަނާ މައާފު ކޮށްދީފައި ވަނީ އެ މުއްދަތުގެ ނިޔަލަށް ހަދާފައިވާ ބިލު ތަކުގެ ތެރެއިން ފައިސާ ނުދައްކާ ހުރި ބިލު ތަކުގެ ޕްރިންސިޕަލް އަދަދު (ޖޫރިމަނާއާއި ނުލާ ބާކީ އަދަދު) ދެއްކުމުން، އެ މުއްދަތުގެ ނިޔަލަށް އަރާފައިވާ ޖޫރިމަނާ މައާފު ކުރެވޭ ގޮތަށެވެ.

ގައުމީ ކަރަންޓު ކުންފުނި، ސްޓެލްކޯ އިން ބުނީ ޖޫރިމަނާއާއި ނުލައި ބާކީ އަދަދު ދެއްކޭނެގޮތަށް ބިލުތަކަށް ވަގުތީގޮތުން އެޖަސްމެންޓެއް ގެނެސްފައިވާނެ ކަމަށެވެ.

އެގޮތުން ޖޫރިމަނާ މައާފުކޮށްދިނުމުން ވެސް ފައިސާ ނުދައްކާ ފަރާތްތަކުގެ ބިލަށް އަންނަ މަހުގެ އެއްވަނަ ދުވަހުން ފަށައިގެން ޖޫރިމަނާގެ ފައިސާ ހިމަނާނެ ކަމަށް ސްޓެލްކޯއިން ބުނެފައިވާވެ އެވެ.