ސޫރިއާގެ ރައީސް ބައްޝާރުލް އަސަދު ރަޝިއާގައި ހުންނެވި ކަމަށް ރިޕޯޓުތަކުން ބުނެފި

ބައްޝާރުލް އަސަދު އިރާނުގެ ހާރިޖީ ވަޒީރާ ބައްދަލު ކުރައްވަނީ

ސޫރިއާގެ ރައީސް ބައްޝާރުލް އަސަދާއި އޭނާގެ އާއިލާ މިހާރު ތިއްބެވީ ރަޝިއާގައި ކަމަށް ރަޝިއާގެ ނޫސް އެޖެންސީތަކުން ރިޕޯޓުކޮށްފިއެވެ.

ކްރެމްލިންގެ މަސްދަރަކާ ހަވާލާދީ މި މަޢުލޫމާތު ހާމަކޮށްފައިވާއިރު، ރަޝިއާގެ ކަމާބެހޭ ފަރާތްތަކުން އެމީހުންނަށް ހިމާޔަތް ދީފައިވާ ކަމަށްވެސް ބުނެފައިވެއެވެ.

އިންޓަފެކްސް ނިއުސް އެޖެންސީން ބުނެފައިވަނީ ސޫރިއާގެ ރައީސް އަލްއަސަދު މޮސްކޯއަށް ވަޑައިގެންފައިވާ ކަމަށެވެ. އަދި ރަޝިއާއިން ބައްޝާރަށާއި އޭނާގެ އާއިލާއަށް ހިމާޔަތް ދީފައިވަނީ އިންސާނީ ސަބަބުތަކާހުރެ ކަމަށްވެސް އެ ނޫހުން ބުނެފައިވެއެވެ. ރަޝިއާގެ ގައުމީ ޓީވީންވެސް ވަނީ ބައްޝާރު ރަޝިއާގައި ހުންނެވި ކަން ރިޕޯޓުކޮށްފައެވެ.

ބައްޝާރު އެންމެ ފަހުން ފެނިފައިވަނީ މީގެ ހަފުތާއެއްހާ ދުވަސް ކުރިން ދިމިޝްގުގައި އިރާނުގެ ޚާރިޖީ ވަޒީރާ ބައްދަލުކުރެއްވިއިރުއެވެ. އޭގެފަހުން ސޫރިއާގެ އިދިކޮޅު ހަނގުރާމަވެރިން ވަނީ ކުއްލި ގޮތަކަށް ހަމަލާތައް ވަރުގަދަކޮށްފައެވެ.

ސީރިއަން އޮބްޒަވޭޓަރީ ފޯ ހިއުމަން ރައިޓްސް (އެސްއޯއެޗްއާރު)ގެ ވެރިޔާ ރާމީ އަބްދުއްރަހްމާން ބުނި ގޮތުގައި ބައްޝާރު ވަޑައިގަތް ކަމަށް ބެލެވޭ މަތިންދާބޯޓެއް ދިމިޝްގު އިންޓަނޭޝަނަލް އެއާޕޯޓުން ފުރައިގެން ދިޔައެވެ. އޭގެ ފަހުން ސިފައިން ވަނީ އެއާޕޯޓުގެ ސަލާމަތީ ކަންކަން ބެލެހެއްޓުންވެސް ދޫކޮށްލައިފައެވެ.

ރޮއިޓާސް ނިއުސް އެޖެންސީން ސޫރިއާ ސިފައިންގެ އިސް ދެ އޮފިސަރުންނާ ހަވާލާދީ ބުނެފައިވަނީ އާދީއްތަ ދުވަހުގެ ވަގުތެއްގައި ދިމިޝްގު އެއާޕޯޓުގައި ސީރިއަން އެއާގެ ބޯޓަކަށް އަސަދު އަރާވަޑައިގެންނެވި ކަމަށެވެ. ފްލައިޓްރާޑާ24 ގެ ޑޭޓާއިން ދައްކާ ގޮތުން މަތިންދާބޯޓު އެންމެ ފުރަތަމަ ދަތުރުކުރީ ވެރިރަށާ ދުރަށް އިރުމައްޗަށެވެ.

ސޫރިޔާ