މިފްކޯގެ ސީއީއޯއަކަށް ޔޫކްރެއިންގެ މީހެއް ހަމަޖައްސަން ނިންމައިފި

ސަރުކާރުގެ މަސް ކުންފުނި، މިފްކޯގެ ސީއީއޯ އަދި އެމްޑީ ކަމަށް ޔޫކުރެއިންގެ ރައްޔިތެއް ހަމަޖައްސަން ނިންމައިފިއެވެ.

އިތުބާރުހުރި މަސްދަރުތަކުން ކަށަވަރުވެފައިވާ ގޮތުގައި މިފްކޯގެ ސީއީއޯ ކަމަށް ހަމަޖައްސަން ޕްރައިވެޓައިޒޭޝަން އެންޑް ކޯޕަރައިޓައިޒޭޝަން ބޯޑް (ޕީސީބީ)ން ނިންމާފައިވަނީ ޑރ. ވިޓާލީ ލުބިމޯވްއެވެ.

ޑރ. ވިޓާލީއަކީ ކްރައިސިސް މެނޭޖްމަންޓުގެ ދާއިރާއިން 20 އަހަރު ދުވަހުގެ ތަޖުރިބާ ލިބިފައިވާ، ޔޫކުރެއިނަށް އުފަން، މިހާރު ސުވިޒަލޭންޑުގައި ދިރިއުޅުއްވާ ބޭފުޅެކެވެ. މި ހަފުތާ ތެރޭގައި އޭނާ ރާއްޖެ ވަޑައިގެން މިފްކޯގެ ސީއީއޯގެ ވަޒީފާ އަދާކުރައްވަން ފައްޓަވާނެ ކަމަށް ވެއެވެ.

ޑރ. ވިޓާލީގެ ލިންކްޑްއިން ޕްރޮފައިލްގައިވާ ގޮތުން އޭނާ ވަނީ އިކޮނޮމިކްސް އާއި ޕަބްލިކް އެޑްމިނިސްޓްރޭޝަންގެ ދާއިރާއިން ޕީއެޗްޑީ ހާސިލްކުރައްވާފައެވެ. އަދި އޭނާއަކީ އަޑިއަޅާލާފައިވާ ކުންފުނިތައް ދެމެހެއްޓެނިވި ވިޔަފާރި މޮޑެލްއަކަށް ބަދަލުކުރުމުގެ ތަޖުރިބާ ހުންނެވި ބޭފުޅެއް ކަމަށް އޭނާގެ ޕްރޮފައިލްގައި ބުނެފައިވެއެވެ.

ޑރ. ވިޓާލީ ވަނީ ބައެއް ބޭންކުތަކުގެ ކްރެޑިޓް އަދި ޑިޕާޓްމަންޓުގެ އިސްވެރިއެއްގެ ގޮތުގައި މަސައްކަތްކުރައްވާފައެވެ. އަދި ބައެއް ކުންފުނިތަކުގެ ބޯޑު މެންބަރުކަމާއި އެޑްވައިޒަރުކަން ކުރައްވާފައިވާ އިރު، ބައެއް ކެޕިޓަލް ފަންޑުތަކުގެ ޗީފް ރިސްކް އޮފިސަރުކަން ވެސް ކުރައްވާފައިވެއެވެ.

މި ސަރުކާރު އައުމަށް ފަހު މިފްކޯގެ ސީއީއޯ އަދި މެނޭޖިން ޑިރެކްޓަރަކަށް ހަމަޖެއްސި އަހުމަދު ޝަމާހު ރަޝީދު ވަނީ ކޮރަޕްޝަންގެ މައްސަލަތަކެއް ތުހުމަތުވުމާ ގުޅިގެން މޭ މަހުގެ ތެރޭގައި މަޤާމުން ވަކިކޮށްފައެވެ. އޭގެ ފަހުން މިފްކޯގެ އެމްޑީ އަދި ސީއީއޯގެ މަޤާމު އޮތީ ހުސްކޮށެވެ.