ރާއްޖެ އައި ސީޒަންގެ ފުރަތަމަ ކްރޫޒްލައިނާއިން 2،140 ޕެސެންޖަރުން

--މި ސީޒަންގެ ފުރަތަމަ ކްރޫޒް ލައިނާ

މި ސީޒަންގެ ފުރަތަމަ ކްރޫޒްލައިނާ "އެމްއެސް އައިޑާ ސްޓެލާ" 2،140 ފަސިންޖަރުންނާއި 639 ފަޅުވެރިންނާއި އެކު އިއްޔެ ވަގުތެއްގައި ރާއްޖެ އައިސްފިއެވެ.

މޯލްޑިވްސް އެސޯސިއޭޝަން ފޯ ޔޮޓް އެޖެންޓްސް (މާޔާ) ގެ ރައީސް މުހައްމަދު ނަޝީދު ވިދާޅުވެފައިވަނީ މި ކްރޫޒްލައިނާ ރާއްޖެ އައީ އޮމާންގެ ވެރިރަށް މަސްކެޓުން ކަމަށެވެ. އަދި ދެ ދުވަހު ރާއްޖޭގައި މަޑުކުރުމަށްފަހު ދެން އެ ކްރޫޒްލައިނާގެ މަންޒިލަކީ ސްރީލަންކާގެ ވެރިރަށް ކޮލޮމްބޯ ކަމަށް ވިދާޅުވިއެވެ.

ނަޝީދު އިތުރަށް ވިދާޅުވެފައިވަނީ މި ސީޒަންގައި ގާތްގަނޑަކަށް 14 ނުވަތަ 15 ކްރޫޒްލައިނާ ރާއްޖެ އަންނާނެ ކަމަށް ލަފާކުރެވޭ ކަމަށެވެ. މި ސީޒަން ނިމޭނީ އަންނަ އަހަރުގެ މާޗު މަހަށް ކަމަށް ފާހަގަކުރައްވައި، މިއަހަރު ރާއްޖެ އަންނަ ކްރޫޒްލައިނާގެ އަދަދަކީ މާޔާއިން އުންމީދުކުރާ ވަރަށްވުރެ ދަށް އަދަދެއް ކަމަށް ވިދާޅުވިއެވެ.

ޓޫރިޒަމް މިނިސްޓްރީގެ ގަވާއިދަށް އިސްލާހެއް ނުގެނެވި އެތައް ދުވަހެއްވުމުގެ ސަބަބުން ރާއްޖެއަށް އަންނަން އުޅޭ ޔޮޓުތަކާއި ކްރޫޒްލައިނާތައް ކެންސަލް ކުރަމުންދާތީ މީގެ ކުރިން ވެސް މާޔާއިން ކަންބޮޑުވުން ފާޅުކޮށްފައިވެއެވެ. ނަމަވެސް މި ސަރުކާރު އައުމަށްފަހު އެ ގަވާއިދުތައް ޓޫރިޒަމް މިނިސްޓްރީން މިހާރު ބަދަލުކޮށްދީފައިވާ ކަމަށާއި، އަންނަ އަހަރުގެ ފަހުކޮޅުގެ ސީޒަނުން ފެށިގެން ރަނގަޅުވާނެ ކަމަށް އުންމީދުކުރާ ކަމަށް ނަޝީދު ވިދާޅުވިއެވެ.

ފަތުރުވެރިކަން