އއ. އަތޮޅުގައި އެއާޕޯޓު އެޅުމުގެ މަސައްކަތް އަންނަ އަހަރު ފަށާނެކަމަށް ރައީސް މުއިއްޒު ވިދާޅުވެއްޖެ

އއ. އަތޮޅުގެ ރައްޔިތުންނަށް ވައުދުވެވަޑައިގެންފައިވާ އެއާޕޯޓު މަޝްރޫއުގެ އަމަލީ މަސައްކަތް އަންނަ އަހަރު ފަށާނެކަމުގެ ޔަގީންކަން ރައީސް ޑރ. މުހައްމަދު މުއިއްޒު ދެއްވައިފިއެވެ.

މި ޔަޤީންކަން އެމަނިކުފާނު ދެއްވާފައި ވަނީ އެ އަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ރޭ މަތިވެރީގެ ރައްޔިތުންނާ މުޚާޠަބުކުރައްވަމުންނެވެ.

އއ. މަތިވެރި ފަޅުގައި އެއާޕޯޓެއް އެޅުމަކީ ރިޔާސީ އިންތިޚާބުގެ ކެމްޕޭންގެ ތެރެއިން 5 ސެޕްޓެމްބަރު 2023 ގައި ރައީސް މުއިއްޒު ވެވަޑައިގަތް ވައުދެކެވެ. ރައީސް ވިދާޅުވެފައިވަނީ އެ އަތޮޅުގައި އެއާޕޯޓެއް އޮތުމަކީ އިޤްތިޞާދީ ގޮތުން ބަލާއިރު ދެކޮޅު ޖެހޭ ކަމެއް ކަމަށެވެ.

ރައީސް ވިދާޅުވެފައިވަނީ އއ. އަތޮޅުގައި އެއާޕޯޓެއް އޮތުން އިޤްތިޞާދީ ގޮތުން ދެކޮޅުޖެހޭ ކަމަކަށް ވަނީ، އެ އަތޮޅުގައި ރިސޯޓުތައް ހުރުމާއި ލޯކަލް ޓޫރިޒަމް ފުޅާވެފައި އޮތުމުގެ ސަބަބުންނެވެ. އަދި އެކި ސަރަޙައްދުތަކުގެ ސަރުކާރުގެ ސިޔާސަތުތައް ކުރިއަށްގެންދިއުމަށްޓަކައި ވެސް އެ ސަރަޙައްދުގައި އެއާޕޯޓެއް އަޅަންޖެހޭނެ ކަމަށް ވިދާޅުވިއެވެ.

ރައީސް އިތުރަށް ވިދާޅުވެފައިވަނީ އެއާޕޯޓު އެޅުމުގެ ނަތީޖާއަކަށް ވެގެންދާނީ އެ ރަށަށާއި އެ ދާއިރާ އަދި އެ ސަރަޙައްދުގެ އެހެން ރަށްތަކަށް ވެސް ޓޫރިޒަމްގެ ދާއިރާއިން އިތުރު ދޮރުތައް ހުޅުވިގެންދިއުން ކަމަށެވެ. އަދި އެހެނިހެން އިޤްތިޞާދީ ކަންކަން ކުރުމުގައި ވެސް އެއީ ނަފާ ލިބޭ، ފަސޭހަތައް ލިބިގެންދާނެ ކަމެއް ކަމަށް ވިދާޅުވިއެވެ.

ރައްޔިތުންނާ ގުޅިގެން ކައުންސިލާއި މިނިސްޓްރީން މިކަމުގެ ކޮންސެޕްޓާއި ޕްލޭން އަވަހަށް ނިންމައިދިނުމަށް ރައީސް އެދިވަޑައިގެންފައިވެއެވެ. އަދި މި މަޝްރޫޢާ އެކީގައި ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަސައްކަތްތައް ވެސް ކުރިއަށްގެންދާނެ ކަމުގެ ޔަގީންކަން ރައީސް ދެއްވާފައިވެއެވެ.