ނާއިޝްގެ އިސްލާމީ ކެލިގްރަފީގެ ހުނަރަށް އިސްލާމިކް މިނިސްޓްރީގެ އެހީތެރިކަން ފޯރުކޮށްދެނީ

އިސްލާމީ ކެލިގްރަފީގެ ދާއިރާއިން ހުނަރުވެރިކަން ދައްކުވައިދިން ޖަމާލުއްދީން ސްކޫލުގެ ދަރިވަރު ހުސެން ނާއިޝްއަށް އެކި ގޮތްގޮތުން އެހީތެރިވުމަށް އިސްލާމިކް މިނިސްޓްރީން ނިންމައިފިއެވެ.

ވާހަކަ ދެއްކުމާއި އިވުމުން މަހުރޫމްވެފައިވާ ނާއިޝް ވަނީ އޭނާގެ ސްކޫލުގެ އެކި ފާރުތަކުގައި ގުރުއާނުގެ އާޔަތްތައް ކެލިގްރާފްކޮށްފައެވެ. މީގެ ކުރިން ވެސް އޭނާ ވަނީ ކެލިގްރަފީގެ ހުނަރުވެރިކަން އެކި ގޮތްގޮތުން ދައްކުވައިދީފައެވެ.

ޖަމާލުއްދީން ސްކޫލުގެ ފާރުތަކުގައި ލިޔެފައިވާ ކެލިގްރަފީ ގިނަ ބައެއްގެ ސަމާލުކަން ހޯދުމާ ގުޅިގެން، އިސްލާމިކް މިނިސްޓަރު މުހައްމަދު ޝަހީމް އަލީ ސައީދު މިއަދު ވަނީ ނާއިޝް އާއި އޭނާގެ އާއިލާއާ ބައްދަލުކުރައްވާފައެވެ. މި ބައްދަލުވުމުގައި މިނިސްޓަރު ވަނީ ނާއިޝްގެ ހުނަރު ކުރިއެރުވުމަށް އެކި ގޮތްގޮތުން އެހީތެރިވާން ނިންމާފައިވާ ކަމަށް ވިދާޅުވެފައެވެ.

މިނިސްޓަރު ވިދާޅުވި ގޮތުގައި ނާއިޝްއަށް ދޭން ނިންމާފައިވާ އެހީތަކުގެ ތެރޭގައި ހިމެނެނީ، ދާއިރާއިން ބޭނުންވާ ހުނަރުތައް ތަރައްގީކޮށް ދަސްކުރުމަށް އެހީތެރިވުމާއި، ސްކޫލް ނިމުމުން ގުރުއާނާ ބެހޭ މަރުކަޒުގައި މި ހުނަރު އެހެން ކުދިންނަށް ދަސްކޮށްދިނުމަށް އޭނާއާ ހަވާލުކުރުމެވެ. މީގެ އިތުރުން، އަންނަ އަހަރު ހުޅުވާ އައްޑޫގެ އިސްލާމިކް ސެންޓަރާއި ހިތަދޫ އިސްލާމިކް ސެންޓަރާއި ފުވައްމުލަކު ގުރުއާން މަރުކަޒުގައި ނާއިޝްގެ އިސްލާމިކް ކެލިގްރަފީގެ ލިޔުންތައް ބެހެއްޓުމާއި، އިސްލާމިކް ކެލިގްރަފީ ހެދުމަށް ބޭނުންވާ ޒަމާނީ ވަސީލަތްތައް ހޯދައިދިނުމަށް ވެސް ނިންމާފައިވެއެވެ.

ށ. ކަނޑިތީމަށް އުފަން މި ދަރިވަރު އެންމެ ފުރަތަމަ އަރަބި ކެލިގްރަފީއެއް ތައްޔާރުކުރީ 2022 ވަނަ އަހަރު ބޭއްވި ރިވެލި މައުރަޒަށް ކަމަށް އޭނާގެ އާއިލާއިން ބުނެފައިވެއެވެ.