މީޑިއާ ކައުންސިލަށް އައު ދައުރަކަށް މެމްބަރުން އިންތިހާބު ކޮށްފި

މޯލްޑިވްސް މީޑިއާ ކައުންސިލް (އެމްއެމްސީ)އަށް އައު ދައުރަކަށް މެންބަރުން އިންތިހާބު ކޮށްފި އެވެ.

ސޯޝަލް ސެންޓަރުގައި މިއަދު ހެނދުނު 10:00 އިން 11:00 އަށް ބޭއްވި މީޑިއާ ކައުންސިލް އިންތިހާބުގައި މީޑީއާ ތަކާއި އާންމުންގެ ތެރެއިން މުޅިއެކު 22 ކެންޑިޑޭޓުން ވާދަކުރިއިރު، އެ އިންތިހާބުގައި ވަނީ 139 މީޑީއާ އަކުން ވޯޓްލާފަ އެވެ.

މިހާރު އޮތް އެމްއެމްސީގެ ދައުރު އަންނަ ހޮނިހިރު ދުވަހަށް ހަމަވާތީ، އައު ކައުންސިލަށް މިއަދު 10 މެމްބަރަކު އިންތިބާކު ކުުރުމަށް ވަނީ ވޯޓު ނަގައިފަ އެވެ.

އެގޮތުން މީޑިއާތަކުން އެމްއެމްސީ އަށް އިންތިހާބުވި މެމްބަރުންނަކީ ފާތިމަތު ޝަނާ މުޙައްމަދު (މިހާރު)، ނަޖާހު މަސްއޫދު (ވަގުތު)، ހަސަން ޝާކިރު (އާފަތިސް)، ހަފްސީ އަބްދުﷲ (ހަފްސީ.ކޮމް)، ހުސެއިން ޝަގީފް (ތިލަދުން)، ހުސެއިން ހަސަން (ހަތާވީސް އޮންލައިން)، ފާތިމަތު ނަހުދާ ފާއިޒް (ދިޔަރެސް) އޮންލައިން އެވެ.

އާންމުންގެ ތެރެއިން ކުރިމަތި ލީ ފަރާތް ތަކުން އިންތިހާބު ކުރި ތިން މެމްބަރުންނަކީ އިބްރާޙީމް ފައުޒީ އާއި ފާތިމަތު ފަހުމީ އަދި އިބްރާޙީމް މުޙައްމަދު އެވެ.

ދެ އަހަރު ދުވަހުގެ ދައުރެއް މި މެމްބަރުން އަދާކުރާ އިރު، އެމްއެމްސީގެ ގާނޫނުގައި ވާގޮތުން އެއްވެސް މީހަކަށް ކައުންސިލް މެމްބަރުކަމުގައި ވިދިވިދިގެން ދެ ދައުރެއް އަދާ ނުކުރެވޭނެ އެވެ.

މީޑިއާ ކައުންސިލްގައި ތިބޭ މެމްބަރުންގެ ޖުމުލަ އަދަދަކީ 15 އެވެ.