މީޑިއާ ކައުންސިލަށް އާ މެންބަރުން އިންތިޚާބުކޮށްފި

މޯލްޑިވްސް މީޑިއާ ކައުންސިލް (އެމްއެމްސީ)އަށް އާ މެންބަރުން މިއަދު އިންތިޚާބުކޮށްފި އެވެ.

މިހާރު އޮތް އެމްއެމްސީގެ ދައުރު އަންނަ ހޮނިހިރު ދުވަހަށް ހަމަވާތީ ކައުންސިލަށް މެންބަރުން އިންތިޚާބު ކުރުމަށް މީޑިއާތަކުގެ މެދުގައި އިންތިޚާބު ބޭއްވީ މިއަދު ސޯޝަލް ސެންޓަރުގަ އެވެ.

މި އިންތިޚާބުގައި މީޑިއާތަކާއި އާންމު ފަރާތްތަކުން ޖުމްލަ 22 ކެންޑިޑޭޓުން ވާދަކުރި އެވެ. އަދި 139 މީޑިއާއަކުން ވޯޓުލާފައިވެ އެވެ. މީޑިއާތަކުން އިންތިޚާބުކުރި ހަތް މެންބަރުންގެ ތެރެއިން އެންމެ ގިނަ ވޯޓް ލިބިފައި ވަނީ މިހާރު ނޫހުގެ ފާތިމަތު ޝަނާ މުޙައްމަދު އަށެވެ. އޭނާއަށް 118 ވޯޓުލިބިފައި ވެއެވެ.

ދެވަނައަށް އައީ ވަގުތު ނޫހުގެ ނަޖާޙު މަސްއޫދު 117 ވޯޓާ އެކު އެވެ. މީގެ އިތުރުން ދެން ހޮވިފައި ވަނީ އާފަތިސް ނޫހުން ހަސަން ޝާކިރު - 93 ވޯޓް، ހަފްސީ.ކޮމޮ އިން ހަފްސީ އަބްދުﷲ - 75 ވޯޓް، ތިލަދުން ނޫހުން ހުސައިން ޝަގީފް - 74 ވޯޓް، 27 އޮން ލައިނުން ހުސެއިން ހަސަން - 74  ވޯޓް އަދި ދިޔަރެސްގެ ފާތިމަތު ނަހުދާ ފާއިޒް – 71 ވޯޓާއި އެކުގައެވެ.

އާންމުންގެ ފަރާތުން ކުރިމަތިލީ ފަރާތްތަކުން އިންތިޚާބު ކުރި ތިން މެންބަރުންގެ ތެރޭގައި ގާނޫނީ ވަކީލު އިބްރާހިމް ފައުޒީ 80 ވޯޓާއެކު ހޮވުނުއިރު ، އެމްއެމްސީގެ ކުރީގެ ލީގަލް ހެޑް ފާތިމަތު ފަހުމީ ހޮވުނީ 76 ވޯޓާއި އެކުގައެވެ. އަދި ކުރީގެ ނޫސްވެރިޔާ އިބްރާހިމް މުޙައްމަދު ހޮވުނީ 46 ވޯޓައި އެކުގައެވެ.

މި އިންތިޚާބުގެ ވޯޓުލުމުގެ ކަންކަން ދިޔައީ ވަރަށް އޮމާންކޮށް، މާބޮޑެތި މައްސަލަތަކެއް ނެތި އެވެ. ނަމަވެސް އިންތިޚާބުގެ ފަހު ވަގުތަށް ވެފައި އޮއްވާ ވޯޓަރސް ލިސްޓަށް ބަދަލުތަކެއް ގެނައި މައްސަލައެއް ބައެއް ކެންޑިޑޭޓުންގެ ފަރާތުން ހުށަހެޅި އެވެ.

މި އިންތިޚާބާ ގުޅިގެން އާ މެންބަރުން މަޤާމާ ޙަވާލުވުމަށް ހަމަޖެހިފައިވަނީ އަންނަ ހަފްތާގެ ތެރޭގައި ކަމަށް އެމްއެމްސީން މަޢުލޫމާތު ދީފައިވެ އެވެ. އާ މެންބަރުންގެ ދައުރަކީ ތިން އަހަރު ދުވަހެވެ.