ޒުވާނުންނަކީ ގައުމުގެ ހަކަތަ، ޒުވާނުން ޒުވާނުންގެ ގޮތުގައި މި ސަރުކާރުން ބަލައިގަންނާނެ: ނައިބު ރައީސް

ޒުވާނުންނަކީ މި ގައުމުގެ ހަކަތަ ކަމަށާއި، ޒުވާނުން ޒުވާނުންގެ ގޮތުގައި މި ސަރުކާރުން ބަލައިގަންނާނޭ ކަމަށް ނައިބު ރައީސް ޙުސެއިން މުޙައްމަދު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވެފައި ވަނީ، އއ. އުކުޅަހުގެ ފުޓުބޯޅަ ދަނޑު ހުޅުއްވައިދެއްވުމަށްފަހު ދެއްކެވި ވާހަކަފުޅުގަ އެވެ.

ނައިބު ރައީސް ވިދާޅުވީ އެ ހަކަތައިގައި ވަރު ނެތްކަމުގައިވާ ނަމަ ދިވެހި ގައުމު ނުހިނގާނޭ ކަމަށެވެ. އަދި ޒުވާނުންގެ އަޑު އަހައިގެން، ޒުވާނުންނަށް ހުރި ކަންކަން ފުރިހަމަކޮށްދިނުމަށް މި ސަރުކާރުން އަހަންމިއްޔަތުކަން ދެއްވާ ކަމުގައި އެމަނިކުފާނު ވިދާޅުވި އެވެ.

ކޮންމެ ސަރުކާރަކުން ފެއްޓި މަޝްރޫއެއް ކަމުގައި ވިޔަސް މި ސަރުކާރުން އެ މަޝްރޫއަކަށް އިހުތިރާމު ކުރައްވާނޭ ކަމަށާއި، އަދުގެ ސަރުކާރުން އެ މަޝްރޫއުތައް ނިންމަވައިދެއްވާނޭކަން ފާހަގަ ކުރައްވާ ނައިބު ރައީސް ވިދާޅުވީ އުކުޅަހުގައި ހުޅުވި މި ފުޓުބޯޅަ ދަނޑު، މިކަމުގެ ނަމޫނާއަކަށް ފުދޭ ކަމަށެވެ.

ނައިބު ރައީސް ވިދާޅުވީ، މިގޮތަށް ނުނިމި ހުރި ހުރިހާ ދަނޑުތަކެއް ސަރުކާރުން ނިންމަވައި ދެއްވާނޭ ކަމަށެވެ.

ފުޓްބޯޅަ ދަނޑު ހުޅުއްވައިދެއްވުމުގެ ގޮތުން ނައިބު ރައީސް ވަނީ، ދަނޑުގެ ސްޓޭޖު ކުރިމަތީގައި ދަމާފައިވާ ރިބަންފަށް ކަނޑުއްވާލައްވާފައެވެ.

މީގެ އިތުރުން ދަނޑު ހުޅުވުމުގެ މުނާސަބަތުގައި ކުޅުނު މެޗުގައި ބޭނުން ކުރި ބޯޅައިގައި އެމަނިކުފާނު ސޮއިކުރައްވާފައިވެ އެވެ.

ދަނޑު ހުޅުވުމުގެ މުނާސަބަތުގައި ކުޅުނު މެޗުގައި ވާދަ ކުރީ، ރާއްޖޭގެ ގައުމީ ޓީމުގެ ކުރީގެ ކުޅުންތެރިންގެ މައްޗަށް އެކުލަވާލާފައިވާ ލެޖެންޑުންގެ ޓީމަކާއި، އުކުޅަހު ޒުވާނުންގެ ޓީމެކެވެ.

ރާއްޖޭގައި ފުޓުބޯޅައިގެ ރޫހު ދިރުވާ އާލާކޮށް، ކުޅިވަރުގެ ދާއިރާއިން ރާއްޖެއަށް ތަރައްގީ ގެނައުމަކީ މި ސަރުކާރުގެ މުހިންމު އަމާޒެކެވެ