ދައުލަތުގެ މާލީ ކަންކަން ހަރުދަނާކުރުމަށް ރީފޯމް އޮފީހެއް ޤާއިމްކުރަނީ

ދައުލަތުގެ މާލީ ކަންކަން ހަރުދަނާ ކުރުމަށް ބޭނުންވާ މަސައްކަތް ކުރުމަށް ރީފޯމް އޮފީހެއް ޤާއިމް ކުރުމުގެ މަސައްކަތް މާލީ ވުޒާރާއިން ފަށައިފިއެވެ.

މި އޮފީސް ޤާއިމްކުރުމުގެ މައިގަނޑު މަޤްޞަދަކީ ދައުލަތުގެ މާލީ ކަންކަން ހަރުދަނާކޮށް، ޚަރަދު ކުޑަކޮށް، އާމްދަނީ އިތުރުކުރުމަށް ސަރުކާރުން ގެންނަން ނިންމާފައިވާ އިސްލާހީ ބަދަލުތައް ތަންފީޒުކުރުމުގެ މަސައްކަތް ކުރުމެވެ.

މާލީ ވުޒާރާއިން ބުނެފައިވާ ގޮތުގައި، ރީފޯމް މަސައްކަތް މިހާރުވެސް ފެށިގެން ކުރިއަށްދާ ކަމަށާއި، ރީފޯމް އޮފީހާއެކު ރިފޯމްގެ ހުރިހާ މަސައްކަތެއް އެއް ހަމައެއްގައި ކުރިއަށް ގެންގޮސް، އެކަމުގެ މަޢުލޫމާތު ރައްޔިތުންނަށް ފޯރުކޮށްދެވޭނެ ކަމަށް ވިދާޅުވިއެވެ. މީގެ އިތުރުން، މި މަސައްކަތާއެކު ސަރުކާރުން ކަނޑައަޅާފައިވާ އަމާޒުތައް ހާސިލްކުރުމަށް ފަސޭހަވާނެ ކަމަށްވެސް މާލީ ވުޒާރާއިން ފާހަގަކުރެއްވިއެވެ.

ރީފޯމް އޮފީސް ޤާއިމްކުރުމުގެ މަސައްކަތް ފެށިފައިވާއިރު، އެ އޮފީހުގެ މަސައްކަތް ހިންގުމަށް ކޮމިޝަނަރެއް ހޯދުމަށް މާލީ ވުޒާރާއިން ވަނީ އިޢުލާންކޮށްފައެވެ. މި މަޤާމަށް ޝައުޤުވެރިކަން ފާޅުކުރުމުގެ ފުރުޞަތު މި މަހުގެ 8 ވަނަ ދުވަހުގެ ނިޔަލަށް ވަނީ ހުޅުވާލާފައެވެ.

ރީފޯމް ކޮމިޝަނަރުގެ މަޤާމަށް ކުރިމަތިލާ ފަރާތްތަކުގައި ހުންނަންޖެހޭ ޝަރުޠުތަކުގެ ތެރޭގައި އެކައުންޓިންގ އެންޑް ފައިނޭންސިންގ ދާއިރާއިން ޑިގްރީ ނުވަތަ އެއަށްވުރެ މަތީ ފާސް ހާސިލްކޮށްފައިވުމާއި، މި ދާއިރާގައި 10 އަހަރުގެ ތަޖުރިބާ ހުރުން ހިމެނެއެވެ.

ރީފޯމް ކޮމިޝަނަރުގެ މަސްއޫލިއްޔަތުތަކުގެ ތެރޭގައި އިސްލާޙީ ބަދަލުތަކުގެ އިސްތިރާތީޖުތައް އެކުލަވާލުމާއި، ސަރުކާރު ހިއްސާވާ ކުންފުނިތަކާއި ފިސްކަލް ރިފޯމުތައް ކުރިއަށްދާ ގޮތުގެ ރިޕޯޓުތައް އެކުލަވާލައި، އެކަމާ ގުޅޭ އޮނިގަނޑުތައް އެކުލަވާލުމާއި ރޭވުމުގެ މަސައްކަތް ހިމެނެއެވެ. މި މަސައްކަތްތަކުގެ ސަބަބުން ދައުލަތުގެ މާލީ ހާލަތު ރަނގަޅުވެ، އިޤްތިޞާދީ ކުރިއެރުން ހޯދުމަށް މަގުފަހިވާނެ ކަމަށް އުންމީދުކުރެވެއެވެ.