ދައުލަތުގެ މާލީ ނިޒާމު ހަރުދަނާކުރުމަށް ކޮމިޝަނަރ އޮފް ރިފޯމުގެ މަޤާމަށް މީހަކު ހޯދަނީ

މިނިސްޓްރީ އޮފް ފިނޭންސުން ކޮމިޝަނަރ އޮފް ރިފޯމުގެ މަޤާމަށް މީހަކު ހޯދުމަށް އިޢުލާނުކޮށްފިއެވެ.

މި މަޤާމަށް މީހަކު ހޯދަނީ ދައުލަތުގެ މާލީ ނިޒާމު ހަރުދަނާ ކުރުމުގެ ގޮތުން ކުރިއަށްގެންދާ މަސައްކަތްތަކުގެ ތެރެއިން، ދައުލަތުގެ އެކިއެކި ދާއިރާތައް ރިފޯމް ކުރުމާބެހޭ މަސައްކަތްތައް ހަލުވި ކުރުމަށްޓަކައި ކަމަށް އިޢުލާނުގައި ބަޔާންކޮށްފައިވެއެވެ.

މި މަސައްކަތާ ގުޅޭ މަޢުލޫމާތު ހިމެނޭ ގޮތަށް ތައްޔާރުކުރެވިފައިވާ ޓާމްސް އޮފް ރިފަރެންސް ފިނޭންސް މިނިސްޓްރީގެ ވެބްސައިޓްގައި ޝާއިޢުކޮށްފައިވާ ކަމަށާއި، އިތުރު މަޢުލޫމާތު ބޭނުންވާނަމަ އެ މިނިސްޓްރީއަށް މެއިލް ކުރުމަށް އިޢުލާނުގައި އަންގާފައިވެއެވެ.

މި މަޤާމަށް ޝައުޤުވެރިވާ ފަރާތްތަކުން އަންނަ ހަފްތާގެ އާދިއްތަ ދުވަހުގެ 13:00 ގެ ކުރިން "އެކްސްޕްރެޝަން އޮފް އިންޓަރެސްޓް" އީމެއިލް މެދުވެރިކޮށް ފޮނުވުމަށް އިޢުލާނުގައި ބަޔާންކޮށްފައިވެއެވެ.

ރާއްޖޭގެ މާލީ ހާލަތު ގޯސްވުމުގެ ސަބަބުން ގިނަ ދާއިރާތަކެއް އިޞްލާޙު ކުރުމުގެ މަސައްކަތް ރައީސް ޑރ. މުޙައްމަދު މުޢިއްޒުގެ ސަރުކާރުން ވަނީ ފަށާފައެވެ. މި މަސައްކަތްތަކުގެ ތެރޭގައި، ސަބްސިޑީ މުރާޖަޢާކުރުމާއި، އާސަންދަ ރިފޯމްކުރުމުގެ އިތުރުން އެއް މަސައްކަތެއް ކުރާ މުއައްސަސާތައް އެއްކުރުމުގެ މަސައްކަތް ހިމެނެއެވެ.

ކޮމިޝަނަރ އޮފް ރިފޯމުގެ މަޤާމަށް މީހަކު ހޯދުމަކީ މި އިޞްލާޙީ މަސައްކަތްތައް އިތުރަށް ހަރުދަނާކޮށް، ހަލުވިކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ. މި މަޤާމަށް ޤާބިލު ފަރާތެއް ހޮވުމުން، ދައުލަތުގެ މާލީ ނިޒާމަށް ގެންނަން ބޭނުންވާ އިޞްލާޙުތައް އަވަސް މުއްދަތެއްގައި ގެނެވި، ރާއްޖޭގެ އިޤްތިޞާދީ ހާލަތު ރަނގަޅުވެގެންދާނެ ކަމަށް އުންމީދުކުރެވެއެވެ.