ރާއްޖެ ބަނގުރޫޓުވުމުގެ ނުރައްކަލުން ސަލާމަތްވެއްޖެ - ފިނޭންސް މިނިސްޓަރު

ރައީސުލްޖުމްހޫރިއްޔާ ޑރ. މުޙައްމަދު މުޢމަދު މުޢިއްޒުގެ ދުރުވިސްނުންފުޅާއެކު ރާއްޖެ ބަނގުރޫޓުވުމުގެ ނުރައްކަލުން ސަލާމަތްވެފައިވާ ކަމަށްފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.

މާލީ ވަޒީރު މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބު ދެއްވަމުންނެވެ.

ޒަމީރު ވިދާޅުވި ގޮތުގައި، ރައްޔިތުންނަށް ޚިދުމަތް ކޮށްދެމުން ރާއްޖެއިން ދައްކަން ޖެހިފައި ހުރި ހުރިހާ ދަރަންޏެއް ދައްކަން އުޅެފިނަމަ ރާއްޖެ ބަނގުރޫޓުވާނެ ކަމަށް އައިއެމްއެފްގެ ރިޕޯޓުގައި ފާހަގަކޮށްފައި އޮތީ ރަނގަޅަށެވެ. ނަމަވެސް ރައީސް މުޢިއްޒުގެ ސިޔާސަތުތަކުގެ ސަބަބުން އެ ހާލަތު ބަދަލުކޮށްލެވިފައިވާ ކަމަށް އޭނާ ވިދާޅުވިއެވެ.

މިނިސްޓަރު ޒަމީރު ވިދާޅުވީ ދައުލަތުގެ ޚަރަދުތައް ކުޑަކޮށް، ބޭރުގެ ދަރަނިތައް ދެއްކުން ފަސްކޮށްގެން ބަނގުރޫޓުވުމުގެ ސިނާރިއޯއިން ރާއްޖެ މިހާރު ސަލާމަތްވެފައިވާ ކަމަށެވެ. އަދި އާމްދަނީ އިތުރުކުރުމުގެ މަގުތައް ރަނގަޅުކޮށް، ޚަރަދުތައް އަލުން ބައްޓަންކޮށް، ބައެއް ދަރަނިތަކުގެ މުއްދަތު އިތުރުކުރުމަށް ރަޙުމަތްތެރި ޤައުމުތަކާއެކު މަސައްކަތްކޮށްފައިވާ ކަމަށްވެސް އޭނާ ވިދާޅުވިއެވެ.

މި ސަރުކާރުން ވެރިކަމާ ހަވާލުވިއިރު 124 ބިލިއަން ރުފިޔާގެ ދަރަނި އޮތް ކަމަށް ފާހަގަކުރައްވައި، މިނިސްޓަރު ޒަމީރު ވިދާޅުވީ އޭގެ ދެބައިކުޅަ އެއްބަޔަކީ ކުރީގެ ސަރުކާރުގެ ދަރަނި ކަމަށާއި އަނެއް ބަޔަކީ އޭގެ ކުރީގެ ސަރުކާރުތަކުގެ ދަރަނި ކަމަށެވެ.

މިނިސްޓަރު އިތުރަށް ވިދާޅުވީ ދަރަނީގެ ހާލަތު މިއަދު ބަދަލުކޮށްފައިވާއިރު، ރާއްޖެ ބަނގުރޫޓުވާނެ ކަމަށް ދެކެވޭ ވާހަކަތައް ވެސް މިހާރު ހުއްޓިފައިވާ ކަމަށެވެ. އަދި ބައިނަލްއަޤްވާމީ މާލީ އިދާރާތަކުން މިހާރު އިރުޝާދު ދެނީ ހަމައެކަނި ޚަރަދު ކުޑަކުރުމަށް ކަމަށްވެސް އޭނާ ފާހަގަކުރެއްވިއެވެ.