ޑިޕާޗާ ޓެކްސް އާއި ޑިވެލޮޕްމަންޓް ފީއަށް ގެނައިބަދަލަށް އަމަލުކުރަން ފަށައިފި

ދިވެހިރާއްޖެއިން ފުރާ ފަސިންޖަރުންގެ އަތުން ނަގާ ފީއާއި ޓެކުހުގެ ޤާނޫނަށް ގެނައި އިސްލާހުތަކަށް މިއަދުން ފެށިގެން އަމަލުކުރަން ފަށައިފިއެވެ.

މި އިސްލާހާ އެކު، ވެލާނާ އިންޓަރނޭޝަނަލް އެއަރޕޯޓުން ދަތުރުކުރާ ފަސިންޖަރުންގެ އަތުން އެއަރޕޯޓު ޑިވެލޮޕްމެންޓް ފީ ނެގޭނެއެވެ. އެހެންނަމަވެސް، ރާއްޖޭގެ އެހެން ސަރަހައްދުތަކުގެ ބައިނަލްއަޤްވާމީ އެއަރޕޯޓުތަކުން ދަތުރުކުރާ ފަރާތްތަކުގެ އަތުން ނެގޭނީ ހަމައެކަނި ޑިޕާޗަރ ޓެކުހެވެ.

މި ބަދަލާ އެކު، އިކޮނޮމީ ކްލާހުގައި ދަތުރުކުރާ ބޭރު މީހުންގެ އަތުން ކުރިން ނަގަމުން އައި 30 ޑޮލަރުގެ ބަދަލުގައި 50 ޑޮލަރު ނެގޭނެއެވެ. ބިޒްނަސް ކްލާހުގައި ދަތުރުކުރާ ފަސިންޖަރުންގެ އަތުން 50 ޑޮލަރުގެ ބަދަލުގައި 120 ޑޮލަރު، އަދި ފަސްޓް ކްލާހުގައި ދަތުރުކުރާ މީހުންގެ އަތުން 90 ޑޮލަރުގެ ބަދަލުގައި 240 ޑޮލަރު ނެގޭނެއެވެ. ޕްރައިވެޓް ޖެޓްތަކުގައި ދަތުރުކުރާ ކޮންމެ މީހެއްގެ އަތުން 120 ޑޮލަރުގެ ބަދަލުގައި 480 ޑޮލަރު ނެގޭނެއެވެ.

މި ބަދަލުތައް ގެނެސްފައިވީ ނަމަވެސް، އިކޮނޮމީ ކްލާހުގައި ދަތުރުކުރާ ދިވެހި ފަސިންޖަރުންގެ އަތުން ނަގަމުން އައި ފީއަށް އެއްވެސް ބަދަލެއް ނުގެނެއެވެ. މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން ހާމަކޮށްފައިވާ ތަފާސް ހިސާބުތަކުން ދައްކާ ގޮތުގައި، މިދިޔަ އަހަރު ރާއްޖެއިން ބޭރަށް ދަތުރުކުރި ދިވެހިންގެ 97.8 އިންސައްތަ އަދި ބިދޭސީންގެ 90.2 އިންސައްތަ ދަތުރުކޮށްފައިވަނީ އިކޮނޮމީ ކްލާހުގައެވެ.

މީރާގެ ތަފާސް ހިސާބުތަކުން އިތުރަށް ދައްކާ ގޮތުގައި، މިދިޔަ އަހަރު އެއަރޕޯޓު ޑިވެލޮޕްމެންޓް ފީގެ ގޮތުގައި 65.5 މިލިއަން އެމެރިކާ ޑޮލަރު އަދި ޑިޕާޗަރ ޓެކުހުގެ ގޮތުގައި 64.1 މިލިއަން ޑޮލަރު ލިބިފައިވެއެވެ. ޓެކުހާއި ފީއަށް ގެނެވުނު މި އައު ބަދަލާ އެކު، އަންނަ އަހަރު 1.5 ބިލިއަން ރުފިޔާގެ އާމްދަނީއެއް ލިބޭނެ ކަމަށް ވަނީ އަންދާޒާ ކުރެވިފައެވެ.