ޑޮލަރަށް ބަރޯސާވުން ކުޑަކުރަން އުޅޭނަމަ 100 ޕަސެންޓް ޓެރިފް ނަގާނެ: ޓްރަމްޕް

ބްރިކްސް ގްރޫޕްގެ ގައުމުތަކުން ޑޮލަރަށް ބަރޯސާވުން ކުޑަކުރުމަށް ގެންގުޅޭ ޕްލޭނަށް އަމަލުކުރަން ފަށައިފި ނަމަ އެ ގައުމުތަކުން 100 ޕަސެންޓް ޓެރިފް ނަގާނެ ކަމުގެ އިންޒާރު އިންތިހާބީ ރައީސް ޑޮނަލްޑް ޓްރަމްޕް ދެއްވައިފިއެވެ.

ޓްރަމްޕް އޭނާގެ ޓްރޫތު ސޯޝަލް ވެބްސައިޓުގައި ލިޔުއްވާފައިވަނީ ބްރިކްސްއިން ކަރަންސީއެއް ނުއުފައްދާނެ ކަމާއި ބާރުގަދަ ޑޮލަރުގެ ބަދަލުގައި އެހެން ކަރަންސީއެއް ބޭނުން ނުކުރާނެ ކަމުގެ ޔަގީންކަން ބޭނުންވާ ކަމަށެވެ. އެހެން ނޫން ނަމަ އެ ގައުމުތަކަށް ޖެހޭނީ އެމެރިކާއިން 100 ޕަސެންޓް ޓެރިފްއާ ކުރިމަތިލާން ކަމަށް އޭނާ ވިދާޅުވިއެވެ.

ރަޝިޔާގެ ކަޒާންގައި މިދިޔަ މަހު ބޭއްވި ބްރިކްސް ސަމިޓުގައި ވަނީ ޑޮލަރު ނޫން މުއާމަލާތްތައް ކުރިއެރުވުމާއި އެ ގައުމެއްގެ އަމިއްލަ ފައިސާ ބޭނުންކުރުން ހަރުދަނާ ކުރުމާ ބެހޭ ގޮތުން މަޝްވަރާކޮށްފައެވެ. އަދި ބްރިކްސްގެ ތެރޭގައި ކޮރެސްޕޮންޑެންޓް ބޭންކިން ނެޓްވޯކްތައް ހަރުދަނާކުރުމަށް ގަރާރެއް ވެސް ފާސްކޮށްފައިވެއެވެ.

ޓްރަމްޕް ވިދާޅުވީ ބްރިކްސްގެ ގައުމުތަކުން މިހާރު ގެންގުޅޭ ޕްލޭނާ އެކު ކުރިއަށްދާން ބޭނުންވާ ނަމަ އެ މީހުން ޖެހޭނީ "ވަރުދަ އެމެރިކާ" ގެ އިގްތިސާދަށް މުދާ ވިއްކުން ހުއްޓާލަން ކަމަށެވެ.

ބްރިކްސް ގްރޫޕް 2009 ވަނަ އަހަރު އުފައްދައި މިހާރު ވަރަށް ބޮޑަށް ފުޅާވެފައިވާއިރު، އޭގެ ތެރޭގައި އީރާން، މިސްރު އަދި ޔުނައިޓެޑް އަރަބް އެމިރޭޓްސް ފަދަ ގައުމުތައް ހިމެނެއެވެ. ޖުމްލަގޮތެއްގައި ދުނިޔޭގެ އިގްތިސާދީ އުފެއްދުންތެރިކަމުގެ ބޮޑު ބަޔަކީ ބްރިކްސް ކޯލިޝަނެވެ.