އަލަށް ރިޓަޔާ ކުރާ މީހުންނަށް މަހަކު އެއްފަހަރު ދެމުން އަންނަ އެލަވަންސް ހުއްޓާލަނީ

ސަރުކާރުގެ އެކިއެކި އިދާރާތަކުން ހިންގައި ރިޓަޔަމެންޓް ސްކީމްގެ ތެރެއިން، ވަޒީފާ އިން އަލަށް ރިޓަޔާ ކުރާ މީހުންނަށް މަހުން މަހަށް ދެމުން އަންނަ އެލަވަންސް ކަނޑާލަން ނިންމައިފި އެވެ.

ރިޓަޔާ ކުރާ މުވައްޒަފުންނަށް ކޮންމެ މަހަކު ދޭ އެލަވަންސް ދިނުން އަންނަ އަހަރުގެ ޖެނުއަރީން ފަށައިގެން ހުއްޓާލަން ނިންމައި ފިނޭންސް މިނިސްޓަރު އަދި ޕޭ ކޮމިޝަނުގެ ރައީސް މޫސާ ޒަމީރު ސޮއި ކުރައްވާފައިވާ ސިޓީއެއް ވަނީ ސަރުކާރުގެ އިދާރާ ތަކަށް ފޮނުވާފައެެވެ.

އެ ސިޓީގައި ބުނެފައި ވަނީ އެ ނިންމުމަކީ ސަރުކާރުގެ ރިފޯމް އެޖެންޑާގެ ދަށުން ހަރަދު ކުޑަ ކުރަން އަޅަން ނިންމާފައިވާ ފިޔަވަޅެއް ކަމަށެވެ.

މީގެ އިތުރުން އަންނަ ޖެނުއަރީން ފެށިގެން ޢަމަލު ކުރަން ފަށާ އެ އުސޫލުގެ ދަށުން، ރިޓަޔާ ކުރާ މީހުންނަށް ކޮންމެ މަހަކު ލިބޭ އެލަވަންސް ދެން ނުލިބޭނެ ކަމަށާއި އެކަމަކު، ރިޓަޔާ ކުރާ މުވައްޒަފުންނަށް ގަނޑުކޮށް ދޭ ފައިސާ ދެމުން ދާނެ ކަމަށް އެ ސިޓީގައިވެ އެވެ.

"އަލަށް ރިޓަޔާކުރާ މުވައްޒަފުންނަށް އިނާޔަތް ދިނުން ހުއްޓާލި ނަމަވެސް މި އަހަރުގެ ނިޔަލަށް ވަޒީފާ އިން ރިޓަޔާވެ މަހުން މަހަށް އިނާޔަތް ލިބޭ މުވައްޒަފުންގެ އިނާޔަތަށް އެއްވެސް އުނިކަމެއް ނާންނާނެ،" ސިޓީގައިވެ އެވެ.

ވަޒީފާއިން އަލަށް ރިޓަޔާ ކުރާ މުވައްޒަފުންނަށް އިނާޔަތް ދިނުުން ހުއްޓާލަން ނިންމާފައިވާއިރު، އުމުރުން 65 އަހަރުން މަތީގެ މީހުންނަށް ކޮންމެ މަހަކު ދައުލަތުން ދެމުން އަންނަ 5،000 ރުފިޔާގެ އަސާސީ ޕެންޝަން، އަތްމަތި ތަނަވަސް މީހުންނަށް ނުލިބޭ ގޮތަށް އަންނަ އަހަރުގެ ބަޖެޓުގައި ހިމަނާފައިވެއެވެ.