ހުޅުމާލޭ 4000 ފްލެޓުގެ މަޝްރޫޢުއަށް ނުދައްކާ އޮތް 178 މިލިޔަން ރުފިޔާ ދައްކާ ޚަލާސްކޮށްފި

ހުޅުމާލޭ ދެވަނަ ފިޔަވަހީގައި ތަރައްޤީކުރަމުންދާ 4000 ހައުސިން ޔުނިޓްގެ މަސައްކަތަށް ނުދައްކާ އޮތް 178 މިލިޔަން ރުފިޔާ ދައްކާ ޚަލާސްކޮށްފައިވާކަމަށް ފަހި ދިރިއުޅުން ކޯޕަރޭޝަން (އެފްޑީސީ) ގެ މެނޭޖިން ޑިރެކްޓަރ ހަމްދާން ޝަކީލް ވިދާޅުވެއްޖެއެވެ.

އޭނާ މިކަން ހާމަކޮށްފައި ވަނީ ޕީއެސްއެމް ނިއުސްގެ "ހަފްތާ 52" ޕްރޮގްރާމްގައި ވާހަކަދައްކަވަމުންނެވެ.

މި މަޝްރޫޢުގެ މަސައްކަތް ކުރަމުން އަންނަނީ އިންޑިއާގެ ކުންފުނި ކަލްޕަތާރޫ ޕްރޮޖެކްޓްސް އިންޓަރނޭޝަނަލް ލިމިޓެޑް (ކޭޕީއައިއެލް) އާއި ނެޝަނަލް ބިލްޑިންގްސް ކޮންސްޓްރަކްޝަން ކޯޕޮރޭޝަން (އެންބީސީސީ) އިންނެވެ. މި މަޝްރޫޢުގެ އަގުގެ 15 އިންސައްތަ ދިވެހި ދައުލަތުން ދައްކަން ޖެހޭއިރު، ބާކީ 85 އިންސައްތަ ދައްކަނީ އިންޑިއާ ސަރުކާރުންނެވެ.

ހަމްދާން ވިދާޅުވި ގޮތުގައި މި ސަރުކާރު ހަވާލުވިއިރު މަޝްރޫޢުއަށް ދައުލަތުން ދައްކަންޖެހޭ ފައިސާ އެއްކޮށް ދައްކާފައި ނުވާތީ، ފްލެޓްތަކުގެ މަސައްކަތް ނިންމުން ލަސްވެފައިވެއެވެ. ނަމަވެސް، މި ސަރުކާރު ހަވާލުވުމަށްފަހު ފުރަތަމަ 6 މަސްދުވަހުގެ ތެރޭގައި ނުދައްކާ އޮތް 178 މިލިޔަން ރުފިޔާ ދައްކާ ޚަލާސްކޮށްފައިވާކަމަށް އޭނާ ވިދާޅުވިއެވެ.

މީގެ އިތުރުން، ކޮންޓްރެކްޓަރުގެ މަސައްކަތަށް އިސްލާހުތަކެއް ގެނެސް، މަސައްކަތް އަވަސްކުރުމަށް ފިޔަވަޅުތަކެއް އަޅާފައިވާކަމަށް ހަމްދާން ވިދާޅުވިއެވެ. މިކަމުގެ ނަތީޖާއެއްގެ ގޮތުން، ކުރިއާ އަޅާބަލާއިރު މަސައްކަތް ވަރަށް ބޮޑަށް އަވަސްވެފައިވާކަމަށް އޭނާ ފާހަގަކުރެއްވިއެވެ.

މި މަޝްރޫޢުގެ ދަށުން ޖުމްލަ 32 ޓަވަރެއް އެޅުމުގެ މަސައްކަތް ދަނީ ކުރިއަށެވެ. މީގެ ތެރެއިން ކޭޕީއައިއެލްއިން ތަރައްޤީކުރަމުންދާ 16 ޓަވަރަށް ކިޔަނީ "އަމާން އުދަރެސް" އެވެ. އަދި އެންބީސީސީން ތަރައްޤީކުރަމުންދާ 16 ޓަވަރަށް ކިޔަނީ "އަމާން ދޯދި" އެވެ. އެފްޑީސީގެ އަމާޒަކީ މި 4000 ފްލެޓުގެ މަސައްކަތް 2025 ވަނަ އަހަރުގެ ޖުލައި މަހަށް ނިންމުމެވެ.