އީސީގެ ހުސްވެފައިވާ މަގާމުތަކަށް ކުރިމަތިލާން ހުޅުވާލައިފި

އިލެކްޝަންސް ކޮމިޝަނުން ހުސްވެފައިވާ މެންބަރުކަމުގެ މަޤާމުތަކަށް ކުރިމަތިލުމަށް ރައީސުލްޖުމްހޫރިއްޔާގެ އޮފީހުން މިއަދު ހުޅުވާލައިފިއެވެ.

މި ފުރުޞަތު ހުޅުވާލާފައިވަނީ އަންނަ ހަފްތާގެ ބުރާސްފަތި ދުވަހުގެ ނިޔަލަށެވެ.

އިލެކްޝަން ކޮމިޝަނުގެ 5 މެންބަރުންގެ ތެރެއިން މިވަގުތު ދެ މެންބަރެއްގެ މަޤާމު ހުސްވެފައިވަނީ، އެ ކޮމިޝަނުގެ ނައިބު ރައީސް ޢަލީ ނަޝާތާއި، ކޮމިޝަންގެ މެންބަރު މުޙައްމަދު އާސިފް މަޤާމުން ވަކިކުރުމަށް ރައްޔިތުންގެ މަޖިލީހުން ފާސްކުރުމާ ގުޅިގެންނެވެ. މިހާރު ކޮމިޝަނުގައި ތިބީ އެންމެ ދެ މެންބަރުންނެވެ.

އިލެކްޝަންސް ކޮމިޝަންގެ މެންބަރުކަމަށް ކުރިމަތިލުމަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައިވަނީ، ރަސްމީ ބަންދު ދުވަސްތައް ފިޔަވައި، އެހެން ދުވަސްދުވަހު ހެނދުނު 08:30 އިން 12:00 އަށް ރައީސުލްޖުމްހޫރިއްޔާގެ އޮފީހުންނެވެ.

ދާދިފަހުން އިލެކްޝަންސް ކޮމިޝަނުގެ ޤާނޫނަށް ގެނެވުނު އިސްލާހުގެ ދަށުން، ކޮމިޝަނުގެ ރައީސާއި ނައިބު ރައީސް އައްޔަންކުރާނީ ކޮމިޝަނުގެ މެންބަރުންގެ ތެރެއިން ރައީސުލްޖުމްހޫރިއްޔާއެވެ. މީގެ ކުރިން މި މަޤާމުތަކަށް މީހުން ހޮވަމުން އައީ މެންބަރުންގެ މެދުގައި ނަގާ ވޯޓަކުންނެވެ.

މި ބަދަލުތަކާއެކު، އިލެކްޝަންސް ކޮމިޝަނަށް އައު މެންބަރުން އައްޔަންކުރުމުގެ މަސައްކަތް ކުރިއަށްދާއިރު، ކޮމިޝަނުގެ އޮނިގަނޑަށް އައިސްފައިވާ ބަދަލުތަކުގެ އަސަރު ފެންނަން ފަށާނެކަން ފާހަގަކުރެވެއެވެ.