ބޮޑެތި ހޮޓާތަކުން މާރުކުރަންޖެހޭ އަދަދު ކުޑަކޮށް، ފަތުރުވެރިކަމުގެ ދާއިރާއަށް ލުޔެއް

ގެސްޓް ހައުސްތަކުންނާއި ހޮޓާތަކުން ޑޮލަރު މާރުކުރަން ޖެހޭ އަދަދުކުޑަކުރަނީ

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލާފައިވާ ބޭރު ފައިސާއާ ބެހޭ އައު ބިލުގައި، މީހުން ދިރިއުޅޭ ރަށްރަށުގައި ހަދާފައިވާ 50 އަށްވުރެ ގިނަ ކޮޓަރީގެ ޓޫރިސްޓު ހޮޓާތަކުން ފަތުރުވެރިއަކަށް މާރުކުރަންޖެހޭ އަދަދު 500 ޑޮލަރުން 25 ޑޮލަރަށް ކުޑަކުރުމަށް ހުށަހަޅަން ނިންމައިފިއެވެ.

މިއީ ފަތުރުވެރިކަމުގެ ދާއިރާއިން ފާޅުކުރަމުން އައި ކަންބޮޑުވުންތަކަށް އަމާޒުކޮށް ގެނެސްފައިވާ މުހިންމު ބަދަލެކެވެ.

މި ބިލުގެ މައިގަނޑު މަޤްޞަދަކީ މިދިޔަ މަހުގެ އެއްވަނަ ދުވަހު އަމަލުކުރަން ފެށި ބޭރު ފައިސާގެ ގަވާއިދު އިތުރަށް ހަރުދަނާކުރުމެވެ. ބިލުގައި ގެނެސްފައިވާ މުހިންމު ބަދަލުތަކުގެ ތެރޭގައި، 50 އަށްވުރެ ގިނަ ކޮޓަރި ހުންނަ ހޮޓާތައް ވެސް ގެސްޓްހައުސްތަކާ އެއް ކެޓަގަރީއެއްގައި ހިމެނުން ހިމެނެއެވެ.

މީގެ އިތުރުން، އަހަރަކު 20 މިލިއަން ޑޮލަރަށްވުރެ ބޮޑު އާމްދަނީ ލިބޭ، ފަތުރުވެރިކަމުގެ ދާއިރާގައި ނުހިމެނޭ ވިޔަފާރިތަކުން ވެސް ވަކި އަދަދެއް މާރުކުރަން ޖެހޭނެ ކަމަށް ބިލުގައި ހުށަހަޅާފައިވެއެވެ. އަދި ބޭރު ފައިސާ މާރުކުރުމުން އިސްތިސްނާވާނެ ފަރާތްތަކާއި ހާލަތްތަކެއްވެސް ބިލުގައި ކަނޑައަޅާފައިވެއެވެ.

މި ބަދަލުތައް ގެނެސްފައިވަނީ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުން މިހާރުގެ ގަވާއިދާ ގުޅޭގޮތުން ކަންބޮޑުވުން ފާޅުކުރަމުން އައި ދަނޑިވަޅެއްގައެވެ. މިހާރުގެ ގަވާއިދުގެ ސަބަބުން ބައެއް ހޮޓާތަކަށް ދަތިތަކާ ކުރިމަތިވެފައިވާކަން ފާހަގަކުރެވެއެވެ.

އެމްއެމްއޭ