ލަންކާއަށް ހަކުރު ގެންދިޔަ މައްސަލައިގައި އެސްޓީއޯގެ ބައިވެރިވުމެއް ނެތް

އިންޑިއާއިން ރާއްޖެއަށް ކަނޑައަޅާފައިވާ ހަކުރު ކޯޓާއިން ބައެއް، ގަވާއިދާ ހިލާފަށް ސްރީ ލަންކާއަށް ފޮނުވުމުގެ މައްސަލައިގައި އެސްޓީއޯގެ އަދި އެއްވެސް ދިވެއްސެއްގެ ބައިވެރިވުމެއް ނެތްކަމުގެ ޔަގީންކަން އެ ކުންފުނީގެ މެނޭޖިން ޑިރެކްޓަރު ޝިމާދު އިބްރާހިމް މިއަދު ދެއްވައިފިއެވެ.

މި މައްސަލައަކީ އިންޑިއާއިން ރާއްޖެއަށް ފޮނުވަން ނިންމި 70 ޓަނުގެ ހަކުރު، ރާއްޖެ ނުގެނެސް ސްރީ ލަންކާއަށް ގެންދިޔަ ކަމަށް ބުނެ އުފެދިފައިވާ މައްސަލައެކެވެ. އިންޑިއާގެ ބައެއް ނޫސްތަކުން ރިޕޯޓުކޮށްފައިވާ ގޮތުގައި މިހާރު އިންޑިއާ ސަރުކާރުން ވަނީ މި މައްސަލަ ތަހުގީގުކުރަން ފަށާފައެވެ.

އެސްޓީއޯގެ އެމްޑީ ޝިމާދު ވިދާޅުވެފައިވަނީ ރާއްޖެއަށް ހަކުރު ލިބުމުގައި އެއްވެސް ތާށިކަމެއް ކުރިމަތިނުވާނެ ކަމަށެވެ. އެހެންނަމަވެސް، އިންޑިއާގެ ނޫސްތަކުން ރިޕޯޓުކޮށްފައިވަނީ މި މައްސަލަ ފެންމަތިވުމާ ގުޅިގެން ރާއްޖެއަށް ހަކުރު އެކްސްޕޯޓްކުރުން މަޑުޖައްސާލާފައިވާ ކަމަށެވެ.

އިންޑިއާ ޝިޕިން ނިއުސްގައި ބުނެފައިވާ ގޮތުގައި މި މައްސަލަ ފެންމަތިވެގެން ރިޕޯޓުކޮށްފައިވަނީ މިދިޔަ 25 އޮކްޓޫބަރުގައެވެ. އަދި މިހާރު އިންޑިއާގެ އިގްތިސާދީ ވުޒާރާގެ ދަށުން ހިންގާ ދި ޑައިރެކްޓަރޭޓް ޖެނެރަލް އޮފް ފޮރިން ޓްރޭޑް (ޑީޖީއެފްޓީ)އިން މި މައްސަލަ ތަހުގީގުކުރަމުންދާ ކަމަށް އެ ނޫހުން ބުނެފައިވެއެވެ.

މި މައްސަލައިގައި އިންޑިއާގެ ނާވާ ޝެވާ ޕޯޓުން ރާއްޖެ ފޮނުވަން ތައްޔާރުކޮށްފައި އޮތް 7 ޕާރުސަލް ހަކުރު އެހެން ގައުމަކަށް ފޮނުވާފައިވާ ކަމަށް ޝައްކުކުރެވޭ ކަމަށް ވެސް އިންޑިއާގެ ނޫސްތަކުން ރިޕޯޓުކޮށްފައިވެއެވެ. އަދި މި މައްސަލަ ފެންމަތިވުމާ ގުޅިގެން 70 އެއްހާ ކޮންޓޭނަރުގެ ހަކުރު ލަންކާގެ ކަސްޓަމްސްއިން ހިފަހައްޓާފައިވާ ކަމަށްވެސް ބުނެފައިވެއެވެ.

މި މައްސަލަ ދިމާވެގެން އުޅެނީ މިދިޔަ 5 އޭޕްރީލްގައި ރާއްޖެއާއި އިންޑިއާއިން ހެދި ހާއްސަ އެއްބަސްވުމެއްގެ ދަށުން ރާއްޖެއަށް ފޮނުވަން ނިންމާފައިވާ ޖުމްލަ 64،494.33 ޓަނުގެ ހަކުރުގެ ތެރޭގައި ހިމެނޭ 70 ޓަނާ ގުޅޭގޮތުންނެވެ. މި އެއްބަސްވުމުގެ ދަށުން ހަކުރުގެ އިތުރުން އެހެން ބާވަތްތަކެއްވެސް އިންޑިއާއިން ރާއްޖެއަށް އިމްޕޯޓްކުރަން ވަނީ ނިންމާފައެވެ.