މަސްތުވާތަކެއްޗާއި ގޭންގު ކުށްތަކާ ދެކޮޅަށް އާ ގާނޫނުތަކެއް އަންނަނީ

މަސްތުވާތަކެއްޗާއި ގޭންގު ކުށްތައް ހުއްޓުވުމަށް ގާނޫނުތައް ވަރުގަދަކުރުމުގެ ގޮތުން، ރައްޔިތުންގެ މަޖިލީހުގެ މިހާރު ހިނގަމުންދާ ދައުރުގައި އައު ބިލުތަކެއް ހުށަހަޅުއްވާނެ ކަމަށް ރައީސް މުހައްމަދު މުއިއްޒު މިއަދު އިއުލާންކުރައްވައިފިއެވެ.

ރައީސް މުއިއްޒު މިކަން އިއުލާނު ކުރައްވާފައި ވަނީ އެކްސް ގައި ކުރެއްވި ޕޯސްޓެއްގައެވެ. އޭގައި އެ މަނިކުފާނު ވިދާޅުވީ، މަސްތުވާތަކެތީގެ ވަބާއިން ސަލާމަތްވުމަށް ދައުލަތުގެ އިދާރާތަކުން ކުރަމުންދާ މަސައްކަތަށް ދިމާވާ އެންމެ ބޮޑު އެއް ގޮންޖެހުމަކީ މިހާރު އަމަލުކުރަމުންދާ މަސްތުވާތަކެތީގެ ގާނޫނުގައި ހުރި ބައެއް އުނިކަންކަން ކަމަށެވެ.

މި ހަފުތާގެ ތެރޭގައި މަސްތުވާތަކެތީގެ ގާނޫނަށް އިސްލާހުތަކެއް ގެނައުމަށް ސަރުކާރުން މަޖިލީހަށް ހުށަހަޅާނެ ކަމަށް ރައީސް މުއިއްޒު ވިދާޅުވިއެވެ. މި އިސްލާހުތަކަކީ މަސްތުވާތަކެތީގެ މައްސަލަތައް ތަހުގީގުކޮށް، ދައުވާ ކުރުމުގައި ހުރި ގުރި ގޮންޖެހުންތައް ނައްތާލުމަށްޓަކައި، ދައުލަތުގެ ކަމާ ގުޅުން ހުރި އިދާރާތަކުގެ މަޝްވަރާއާ އެކު އެކުލަވާލެވޭ އިސްލާހުތަކެއް ކަމަށް އެ މަނިކުފާނު ވިދާޅުވިއެވެ.

މީގެ އިތުރުން، މަސްތުވާތަކެތީގެ މައްސަލަތަކާ ގުޅިފައިވާ ގޭންގު ކުށްތަކާ ދެކޮޅަށްވެސް އައު ގާނޫނެއް ގެނައުމަށް ސަރުކާރުން ރާވާފައިވާ ކަމަށް ރައީސް މުއިއްޒު ހާމަކުރެއްވިއެވެ. މިގޮތުން، މިހާރު އަމަލުކުރަމުންދާ ގޭންގު ކުށްތައް މަނާކުރުމުގެ ގާނޫނުގެ ބަދަލުގައި، އަލަށް އެކުލަވާލެވޭ "ގޭންގު ހަދައިގެން ކުރާ ކުށްތައް މަނާކުރުމުގެ ބިލު" ކުރިއަށް އޮތް ދެ ހަފުތާގެ ތެރޭގައި މަޖިލީހަށް ހުށަހަޅާނެ ކަމަށް އެ މަނިކުފާނު ވިދާޅުވިއެވެ.

އެމަނިކުފާނު މިފަދައިން ވިދާޅުވެފައިވާއިރު މިދިޔަ ހޮނިހިރު ދުވަހުގެ ރޭ ރާއްޖޭގެ ސަރަހައްދުން 468.6 ކިލޯގެ މަސްތުވާތަކެތި ވަނީ އަތުލައި ގަނެފައެވެ. ފުލުހުން ބުނެފައިވާ ގޮތުގައި، ސްރީ ލަންކާގެ މަސްބޯޓަކުން ފެނުނު މި ތަކެތީގެ ތެރޭގައި 344 ކިލޯގެ މެތާއި 124.6 ކިލޯގެ ކޮކެއިން ހިމެނެއެވެ. މި ތަކެތީގެ މަގުމަތީ އަގު 1 ބިލިއަން ރުފިޔާއަށް އަރާ ކަމަށް ވެސް ފުލުހުން ބުނެފައިވެއެވެ.