ބެޑްމިންޓަނުން ރަން ވަނަތައް ހޯދި އެތުލީޓުންނަށް ރައީސް ތަހުނިޔާ ވިދާޅުވެއްޖެ

ބޮޓްސްވާނާ އިންޓަނޭޝަނަލް ސީރީޒް ބެޑްމިންޓަން 2024 ގައި ރާއްޖެ ތަމްސީލުކޮށް ތާރީޚީ ކާމިޔާބީއެއް ހޯދައިދިން ފާތިމަތު ނަބާހާއާއި އާމިނަތު ނަބީހާއަށް ރައީސް ޑރ. މުހައްމަދު މުއިއްޒު ތަހުނިޔާ ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ ބެޑްމިންޓަން ވޯލްޑް ފެޑެރޭޝަންގެ މުބާރާތެއްގައި އަންހެނުންގެ ސިންގަލްސް ފައިނަލުގައި ވާދަކުރަން ދިވެހިރާއްޖޭގެ ފަރާތުން އެއްމާބަނޑު ދެބެއިން ހޮވުމާއެކު، ޗެމްޕިއަންކަމާއި ރަނަރަޕްކަން ވެސް ރާއްޖެއަށް ކަށަވަރުވެއްޖެ ކަމަށެވެ.

މި މުބާރާތުގައި ދިވެހި ކުޅުންތެރިން ދެ ގޯލްޑް މެޑެލް، ދެ ސިލްވަރ މެޑެލް އަދި ހަތަރު ބްރޯންޒް މެޑެލް ކަށަވަރުކޮށްފައިވާ ކަމަށް ރައީސް މުއިއްޒު ފާހަގަކުރެއްވިއެވެ. އަދި ދިވެހި ކުޅުންތެރިން ދައްކަމުންދާ މޮޅު ކުޅުމަށްޓަކައި ފަޚުރުވެރިކަމާއެކު ސާބަސް ދެއްވާ ކަމަށް ވެސް އެމަނިކުފާނު ވިދާޅުވިއެވެ.

ބޮޓްސްވާނާ މުބާރާތުގެ ސިންގަލްސް ފައިނަލުގައި ވާދަކުރީ ނަބީހާއާއި ނަބާހާއެވެ. މި މުބާރާތުގެ ސިންގަލްސް ފައިނަލުން އެއްވަނަ ހޯދީ ނަބާހާއެވެ. މީގެ އިތުރުން، މި މުބާރާތުގެ މިކްސްޑް ޑަބަލްސްގެ ފައިނަލުން ޖާގަ ހޯދީ ޒަޔާނާއި ނަބާހާއެވެ.

ނަބީހާއާއި ނަބާހާއަކީ ބައިނަލްއަގްވާމީ އެކިއެކި މުބާރާތްތަކުގައި ބައިވެރިވެ ރާއްޖެ ތަމްސީލުކުރަމުންދާ ދެ އެތްލީޓުންނެވެ. މި ދެ އެތްލީޓުން ވަނީ ރާއްޖެއަށް ގިނަ ކާމިޔާބީތަކެއް ހޯދައިދީފައެވެ.

މި ޝަރަފު ރާއްޖެއަށް ހޯދައިދިން ހުނަރުވެރި ދެބެއިންނަށާއި، ދިވެހި މުޅި ޓީމަށް ތަހުނިޔާ ދަންނަވާ ކަމަށް ރައީސް މުއިއްޒު ވިދާޅުވެފައިވެއެވެ. އަދި މިއީ ތާރީޚީ ކާމިޔާބީއެއް ކަމަށް ވެސް އެމަނިކުފާނުގެ ޕޯސްޓުގައި ލިޔުއްވާފައިވެއެވެ.