ލިވަޕޫލް ލީޑު ފުޅާކުރި އިރު، އާ ކޯޗާއި އެކު ޔުނައިޓެޑް އިޕްސްވިޗާ އެއްވަރުވެއްޖެ

ރޭގެ މެޗުގައި ދެ ލަނޑު ޖެހި ސަލާ އުފާފާޅުކުރަނީ

އިނގިރޭސި ޕްރިމިއާ ލީގުގެ އެއްވަނައިގައި އޮތް ލިވަޕޫލް އިން ރަށުން ބޭރުގައި ކުޅުނު މެޗެއްގައި ސައުތެމްޓަން 3-2 އިން ބަލިކޮށް، އެއްވަނައިގައި އަށް ޕޮއިންޓުގެ ލީޑެއް ނަގައިފިއެވެ.

މި ކާމިޔާބީ ހޯދީ ދެވަނައިގައި އޮތް މެންޗެސްޓަރ ސިޓީ ބަލިވުމުގެ ފައިދާ ނަގައިގެންނެވެ.

ރޭގެ މެޗުތަކަށް ފަހު ލިވަޕޫލް މިހާރު އެއްވަނައިގައި އޮތީ 12 މެޗުން 31 ޕޮއިންޓާ އެކުގައެވެ. އެއަށްފަހު ދެވަނައިގައި އޮތް ސިޓީއަށް 12 މެޗުން ލިބިފައިވަނީ 23 ޕޮއިންޓެވެ. އަންނަ ހަފްތާގައި ލިވަޕޫލުން އަމިއްލަ ދަނޑުގައި ކުޅޭނީ ސިޓީއާ ދެކޮޅަށެވެ.

ރޭގެ ،މެޗުގައި ލިވަޕޫލަށް ލަނޑުތައް ކާމިޔާބުކޮށްދިނީ ޑޮމިނިކް ސޮބޯސްލާއި އާއި މުހައްމަދު ސަލާހު އެވެ. ސަލާ ވަނީ 2 ލަނޑު ކާމިޔާބު ކޮށްދީފައެވެ. އޭގެ ތެރެއިން ފަހު ލަނޑަކީ ސައުތެމްޓަންގެ ޔޫގީ ސުގަވާރާ އަތުގައި ބޯޅަ ޖެހުމުން ލިބުނު ޕެނަލްޓީއަކުން ކާމިޔާބުކޮށްދިން ގޯލެކެވެ. ސައުތެމްޓަންގެ ގޯލްތައް ޖަހައިދިނީ އާމްސްޓްރޯންގް އާއި މަޓެއުސް ފެނާންޑޭޒް އެވެ.

މެންޗެސްޓަރ ޔުނައިޓެޑުގެ އާ ކޯޗު ރުބެން އަމޮރިމްގެ އިރުޝާދުގެ ދަށުން ކުޅުނު ފުރަތަމަ މެޗުގައި، ޔުނައިޓެޑުން ވަނީ އިޕްސްވިޗު ޓައުންއާ 1-1 އިން އެއްވަރުވެފައެވެ. މި މެޗުގައި ޔުނައިޓެޑުން ވަރަށް އަވަހަށް ލީޑު ނެގި ނަމަވެސް، އިޕްސްވިޗުން ވަނީ އެއްވަރުކޮށްފައެވެ.

މި ނަތީޖާއާ އެކު ޔުނައިޓެޑަށް ވަނީ 12 މެޗުން 16 ޕޮއިންޓް ލިބިފައެވެ. އަދި މިހާރު އެ ޓީމު އޮތީ ލީގުގެ 12 ވަނައިގައެވެ. ޔުނައިޓެޑުން ދެވަނަ ހާފުގައި މޮޅުވާން މަސައްކަތްކުރި ނަމަވެސް އެކަން ކާމިޔާބެއް ނުވިއެވެ.

އިނގިރޭސި ޕްރިމިއަރ ލީގު ލިވަޕޫލް މެންޗެސްޓަރ ޔުނައިޓެޑް