އިޒްރޭލް ޕާސްޕޯޓް މަނާ ކުރާ ބިލް އަވަސް ކުރަން ފާސްކޮށްފި

އިސްރާއީލުގެ ޕާސްޕޯޓުގައި ރާއްޖެއަށް ނުވަދެވޭ ގޮތަށް ގާނޫނަށް ބަދަލު ގެނައުމުގެ މަސައްކަތް އަވަސް ކުރަން، ސަލާމަތީ ހިދުމަތްތަކާ ބެހޭ ކޮމެޓީ (241 ކޮމެޓީ) އިން މިއަދު ނިންމައިފިއެވެ. 

ނިމިދިޔަ ހަފްތާގައި ކޮމެޓީން ނިންމާފައި އޮތީ އަންނަ ފެބްރުއަރީ މަހުގެ ނިޔަލަށް އެ ބިލުގެ މަސައްކަތް ނިންމުމަށެވެ.

އެކަމަކު، މިއަދު ވަނީ އެ ނިންމުން ބަދަލު ކުރަން ފާސްކޮށްފައެވެ.

އެ މަސައްކަތް އަވަސް ކުރުމަށްޓަކައި މިއަދު ބޭއްވި ކޮމެޓީގެ ބައްދަލުވުމެއްގައި، އެ ކޮމިޓީގެ މުގައްރިރު އޭދަފުށީ ދާއިރާގެ މެންބަރު އަހުމަދު ސަލީމް ވިދާޅުވީ، އެ ބިލުގެ މަސައްކަތް އަވަސް ކުރަން ބޭނުންވާ ކަމަށެވެ.

އެހެންވެ، ބިލު ދިރާސާ ކުރުމަށް، ކޮމިޓީއަށް ހާޒިރު ކުރާން ޖެހޭ ފަރާތްތަކަށް، އަންނަ ޑިސެމްބަރު މަހުގެ ނިޔަލަށް ސިޓީ ފޮނުވުމަށް ސަލީމް ހުށަހެޅުއްވިއެވެ.

ސަލީމްގެ އެ ވާހަކައަށް ތާއީދުކޮށް، ހުޅުދޫ ދާއިރާގެ މެންބަރު މުޙައްމަދު ޝާހިދު ހުށަހެޅުއްވީ މާދަމާ އިން ފެށިގެންވެސް ކަމާބެހޭ ފަރާތްތައް ހާޒިރުކޮށް، ސުވާލުކޮށް، މައުލޫމާތު އެއްކުރުމަށެވެ.

ޝާހިދުގެ އެ ހުށަހެޅުން ކޮމެޓީގެ އިއްތިފާގުން ވަނީ ފާސްވެފައެވެ.

ބިލުގެ މަސައްކަތް އެއްކޮށް ނިންމާލުމަށް ކޮމެޓީން ފާސްކޮށްފައި އޮތް ފަހު ތާރީހަކީ އަންނަ އަހަރުގެ ފެބްރުއަރީއެވެ.

އިޒްރޭލް ޕާސްޕޯޓު މަނާ ކުރަން އިމިގްރޭޝަން ގާނޫނަށް އިސްލާހު ގެންނަން ހުށަހެޅީ ގަލޮޅު އުތުރު ދާއިރާގެ އެމްޑީޕީ މެންބަރު މީކާއިލް ނަސީމްއެވެ.

މިދިޔަ މޭ މަހުގެ 30 ވަނަ ދުވަހު އޭނާ މަޖިލީހަށް ހުށަހެޅުއްވި ބިލު، މަޖިލީހުން ބަލައިގެންފައި ވަނީ ޖޫން 10 ގައެވެ.

އެކަމަކު އޭގެ ފަހުން އެ މައްސަލައަށް ކުރިއަށް ގެންގޮސްފައި ނުވެއެވެ.