ގާނޫނުއަސާސީއަށް އިސްލާޙުގެނައީ ގައުމުގެ ހަމަޖެހުމާއި މިނިވަންކަން ކަށަވަރުކުރުމަށް: ރައީސް މުއިއްޒު

ގާނޫނުއަސާސީއަށް އިއްޔެ ގެނެވުނު އިސްލާހުތަކަކީ ގައުމުގެ ހަމަޖެހުން ގާއިމްކުރުމަށާއި ރާއްޖޭގެ މިނިވަންކަމާއި ސިޔާދަތު ރައްކާތެރިކުރުމަށް ބާރުއަޅައިދޭނެ ކަމެއްކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

މިދިޔަ އަންގާރަ ދުވަހުގެ ރޭ ކުއްލި ގޮތަކަށް މަޖިލީހަށް ހުށަހެޅުނު ގާނޫނުއަސާސީ އިސްލާހުކުރުމުގެ ބިލު އިއްޔެގެ ޖަލްސާގައި ފުރަތަމަ ކިޔުން އިއްވައި، އިބްތިދާއީ ބަހުސް ނިންމައި، ކޮމިޓީ މަރުހަލާ އަދި މަޖިލީހުން ފާސްކޮށްފައިވެއެވެ. އަދި ރޭގެ ވަގުތެއްގައި ރައީސް ވަނީ އެ ބިލު ތަސްދީގުކޮށް ގެޒެޓުގައި ޝާއިއުކޮށްފައެވެ.

މިކަމާ ގުޅޭގޮތުން ރޭ ދަންވަރުގެ ވަގުތެއްގައި ރައީސް މުއިއްޒު ވަނީ ވީޑިއޯ މެސެޖެއް ދެއްވާފައެވެ. ރައީސް އޮފީހުގެ ސޯޝަލް މީޑިއާގައި އާންމުކުރި އެ މެސެޖުގައި މުއިއްޒު ވިދާޅުވީ ގާނޫނުއަސާސީއަށް ގެނައި އެ އިސްލާހުތަކަކީ ވަރަށް މުހިންމު އިސްލާހުތަކެއް ކަމަށެވެ.

މުއިއްޒު ވިދާޅުވި ގޮތުގައި މި އިސްލާހުތަކުގެ ތެރޭގައި އެންޓި ޑިފެކްޝަން މާއްދާ ހިމެނުމާއި، ރާއްޖޭގެ ސަރަހައްދަށް ބަދަލެއް ގެންނަން ޖެހޭނަމަ މަޖިލީހުގެ ހަތަރުބައިކުޅަ ތިންބައިގެ އަޣުލަބިއްޔަތު ހޯދަންޖެހުން ހިމެނެއެވެ. އަދި ރާއްޖޭގެ ކަނޑުގެ ސަރަހައްދު އެކްސްކުލޫސިވް އިކޮނޮމިކް ޒޯން (އީއީޒެޑް) އާ ހަމައަށް ކަނޑައެޅުމާއި، ބޭރުގެ ސިފައިންނަށް ރާއްޖޭގައި އަމަލީގޮތުން ހަރަކާތްތެރިވެވޭނީ މަޖިލީހުގެ ރުހުން ލިބިގެންކަން ވެސް ހިމެނެއެވެ.

މުއިއްޒު އިތުރަށް ވިދާޅުވީ މި އިސްލާހުތަކަކީ ރާއްޖޭގެ ރައްޔިތުންގެ ހައްގުގައި ރާއްޖޭގެ މިނިވަންކަމާއި، ސިޔާދަތާއި، ތަރައްގީއާއި، ހަމަޖެހުމަށްޓަކައި، ނުހަނު ޖޯޝާއެކު ގައުމީ ރޫހުގައި ނިންމެވި ވަރަށް މުހިންމު ނިންމެވުންތަކެއް ކަމުގައެވެ.