2025 ވަނަ އަހަރުގެ ދައުލަތުގެ ބަޖެޓު ކޮމިޓީން ފާސްކޮށްފި

އަންނަ އަހަރަށް ލަފާކޮށް ސަރުކާރުން ހުށަހަޅާފައިވާ 56.6 ބިލިއަން ރުފިޔާގެ ބަޖެޓު، އިތުރު ބަދަލެއް ނުގެނެސް ރައްޔިތުންގެ މަޖިލީހުގެ ބަޖެޓު ކޮމިޓީން މިއަދު ފާސްކޮށްފިއެވެ.

ނަމަވެސް މަޝްރޫޢުތަކުގެ ތަފްސީލު މަޖިލީހަށް ދިނުމަށް ކޮމިޓީން ވަނީ ޝަރުތުކޮށްފައެވެ.

މިއަދު މެންދުރުފަހު ބޭއްވުނު ބަޖެޓު ކޮމިޓީގެ ބައްދަލުވުމުގައި ބައިވެރިވި 19 މެންބަރުންގެ ތެރެއިން 15 މެންބަރުން ވަނީ ބަޖެޓު ފާސްކުރުމަށް ވޯޓު ދެއްވާފައެވެ. މި ބަޖެޓަކީ މި އަހަރުގެ ބަޖެޓަށްވުރެ 1.6 ބިލިއަން ރުފިޔާ އިތުރު އަދަދެކެވެ.

ބަޖެޓުގެ މައިގަނޑު ބައިތައް:

• ޖުމުލަ ބަޖެޓު: 56.6 ބިލިއަން ރުފިޔާ

• އާމްދަނީ: 39.8 ބިލިއަން ރުފިޔާ

• ޕީއެސްއައިޕީ: 12.4 ބިލިއަން ރުފިޔާ

• ރިކަރަންޓް ޚަރަދު: 36 ބިލިއަން ރުފިޔާ

• ޑެފިސިޓް: 9.4 ބިލިއަން ރުފިޔާ

ކޮމިޓީން ހުށަހެޅި މުހިންމު ހުށަހެޅުންތަކުގެ ތެރޭގައި:

• ޕީއެސްއައިޕީ މަޝްރޫޢުތައް ކްރައިޓީރިއާއަށް ބަލައި ތަރުތީބުކުރުން

• މަޝްރޫޢުތަކުގެ ތަފްސީލު ލިސްޓެއް ފެބުރުވަރީ މަހުގެ ކުރިން މަޖިލީހަށް ފޮނުވުން

• ކުރިއަށްދާނެ އަދި ނުގެންދެވޭނެ މަޝްރޫޢުތަކުގެ މަޢުލޫމާތު މާރިޗު މަހުގެ ކުރިން ހުށަހެޅުން

• ކޮންމެ ކުއާޓަރއެއްގައި މަޝްރޫޢުތަކުގެ ޕްރޮގްރެސް ރިޕޯޓު މަޖިލީހަށް ހުށަހެޅުން

މީގެ އިތުރުން، ސަރުކާރު ކުންފުނިތަކުގެ ހިންގުން ހަރުދަނާކުރުމަށާއި، ޓެކްސް ނުދައްކާ ފަރާތްތަކާމެދު އަޅާ ފިޔަވަޅުތައް މުރާޖަޢާކުރުމަށާއި، ސަބްސިޑީ ޓާގެޓްކުރުމަށް ވެސް ކޮމިޓީން ވަނީ ލަފާ ދީފައެވެ.