ޔޫއޭއީ އަދި ތައިލެންޑުން އާސަންދައިގެ ޚިދުމަތް ލިބޭނެ އިންތިޒާމު ހަމަޖެހުމާ ގާތް - އެންސްޕާ

ޔުނައިޓެޑް އަރަބް އެމިރޭޓްސް (ޔޫއޭއީ) އަދި ތައިލެންޑުން ދިވެހިންނަށް އާސަންދައިގެ ޚިދުމަތް ލިބޭނެ އިންތިޒާމު ހަމަޖެހުމާ ގާތްވެފައިވާ ކަމަށް ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ ސީއީއޯ ހީނާ ވަލީދު މިއަދު ވިދާޅުވެއްޖެއެވެ.

ހީނާ މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގެ އިޖުތިމާޢީ ކޮމިޓީގައި މެންބަރަކު ކުރެއްވި ސުވާލަކަށް ޖަވާބު ދެއްވަމުންނެވެ.

ހީނާ ވިދާޅުވިގޮތުގައި، އާސަންދައިން މިހާރު ޔޫއޭއީ އަދި ތައިލެންޑުގެ ހޮސްޕިޓަލްތަކާއެކު މަސައްކަތްތަކެއް ކުރެވި، ބަޔަކާ އެކު ކުރިއަށްދެވޭނެ ހިސާބަށް ވާސިލުވެފައިވެއެވެ. އަދި މި ޚިދުމަތް ދެވޭނެ ދުވަހަކާއި އެކަމާ ބެހޭ އިތުރު ތަފުސީލުތައް ވަރަށް އަވަހަށް ހާމަކުރާނެ ކަމަށް އޭނާ ވިދާޅުވިއެވެ.

މި ނިންމުމަކީ ރައީސް މުޙައްމަދު މުޢިއްޒު މިދިޔަ ޖެނުއަރީ މަހު އިޢުލާންކުރެއްވި ނިންމުމެކެވެ. ރައީސް އޭރު ވިދާޅުވެފައިވަނީ، އާސަންދައަކީ ހަމައެކަނި ވަކި ޤައުމެއްގައި ހުންނަ ޞިއްޙީ ޚިދުމަތް މަރުކަޒުތަކުގައި އެކަނި ބޭނުންކުރެވޭ އެއްޗެއްގެ ގޮތުގައި އޮތް އޮތުން ނިމުމަކަށް ގެނެސް، ތައިލެންޑާއި ޔޫއޭއީއަށް އާސަންދަ ފުޅާކުރާނެ ކަމަށެވެ.

ރައީސް އިތުރަށް ފާހަގަކުރެއްވި ގޮތުގައި، މި ބަދަލާއެކު އާސަންދައިގެ ދަށުން އެ ޤައުމުތަކުން ބޭސްފަރުވާ ކުރެވޭނެ އިންތިޒާމު ހަމަޖައްސައި، ހޮސްޕިޓަލްތަކުގައި ބޭސްފަރުވާގެ އިތުރުން އެކޮމޮޑޭޝަން ޚަރަދުތައް ވެސް އޭގެތެރޭގައި ހިމަނާނެއެވެ. މިއީ ރާއްޖޭގެ ޞިއްޙީ ނިޒާމު ހަރުދަނާވަންދެން ދިވެހިން ފެންވަރު ރަނގަޅު ޞިއްޙީ ނިޒާމުތައް ހުންނަ ޤައުމުތަކުގެ ހޮސްޕިޓަލުތަކަށް ދިއުމަށް ފަހިކޮށްދޭ ފިޔަވަޅެކެވެ.

މިހާރު އާސަންދައިގެ ޚިދުމަތް ރާއްޖެއިން ބޭރުން ލިބެނީ އަވައްޓެރި އިންޑިއާ އާއި ސްރީލަންކާގެ ބައެއް ހޮސްޕިޓަލުތަކުންނެވެ. މި ބަދަލާއެކު، ދިވެހިންނަށް އިތުރު ޤައުމުތަކަކުން ފެންވަރު ރަނގަޅު ޞިއްޙީ ޚިދުމަތް ހޯދުމުގެ ފުރުޞަތު ލިބިގެންދާނެއެވެ. އަދި މިހާރު ބޭސްފަރުވާއަށް ދާ ދިވެހިންގެ އަތުން އެންމެ ބޮޑު ޚަރަދެއް ދާ އެކޮމޮޑޭޝަން ޚަރަދުތައް ވެސް އާސަންދައިގެ ތެރެއިން ހަމަޖެހިގެންދާނެއެވެ.