ސީ-ޓު-އެއާ ކާގޯ ޚިދުމަތުން 3 މިލިއަން ޑޮލަރަށް ވުރެ ގިނަ އާމްދަނީ ލިބިއްޖެ

ސީ-ޓު-އެއާ ކާގޯގެ ޚިދުމަތުން މިހާތަނަށް ތިން މިލިއަނަށް ވުރެ ގިނަ ޑޮލަރު ލިބިފައިވާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސީއީއޯ މުހައްމަދު ވަޖީހު އިބްރާހީމް ވިދާޅުވެއްޖެއެވެ.

މި ޚިދުމަތަކީ ވައިގެ މަގުންނާއި ކަނޑު މަގުން މުދާ އެއްތަނުން އަނެއް ތަނަށް އުފުލައިދޭ ޚިދުމަތެކެވެ.

މިދިޔަ މެއި މަހު ފެށި މި ޚިދުމަތުން ރާއްޖޭގެ އިގްތިސާދަށް މިހާތަނަށް ތިން މިލިއަނަށް ވުރެ ގިނަ އެމެރިކާ ޑޮލަރު ލިބިފައިވާ ކަމަށް ވަޖީހު ވިދާޅުވިއެވެ. އަދި މިއީ އިގްތިޞާދަށް ބޮޑު މަންފާއެއް ކުރާނެ ސިނާއަތަކަށް ހެދުމަށް މަސައްކަތް ކުރަމުން އަންނަ ކަމަށްވެސް އޭނާ ފާހަގަކުރެއްވިއެވެ.

މިހާތަނަށް ކަނޑު މަގުން ރާއްޖެ އައި 210 ކޮންޓެއިނަރުން 1،008،000 ކިލޯގެ މުދާ ދުނިޔޭގެ އެކި ގައުމުތަކަށް ވައިގެ މަގުން ފޮނުވާފައިވާ ކަމަށް ވަޖީހު ވިދާޅުވިއެވެ. މި މުދާ ރާއްޖޭން ބޭރަށް ގެންދަން 11 އެއާލައިނަކުން ބައިވެރިވެފައިވާ ކަމަށާއި މުދާ ފޮނުވޭ ގައުމުތަކުގެ ތެރޭގައި އެމެރިކާއާއި ކެނެޑާއާއި އިނގިރޭސި ވިލާތުގެ އިތުރުން ޔޫރަޕްގެ ގައުމުތައް ހިމެނޭ ކަމަށް އޭނާ ވިދާޅުވިއެވެ.

މީގެއިތުރުން، މިދިޔަ އަހަރާ އަޅައިބަލާއިރު ރާއްޖެއަށް އައި ކާގޯގެ އަދަދު 16 ޕަސެންޓަށް އިތުރުވެފައިވާ ކަމަށް އެމްޕީއެލްގެ ހިސާބުތަކުން ދައްކާކަން ވަޖީހު ފާހަގަކުރެއްވިއެވެ. އޭގެ ތެރޭގައި ކޮންޓެއިނަރ ކާގޯގެ 9 އިންސައްތަ އާއި ޖެނެރަލް ކާގޯގެ 22 އިންސައްތަ އިތުރުވުން ހިމެނެއެވެ.

މި ޚިދުމަތް ކުރިއަށް ގެންދަނީ އެމްޕީއެލް އާއި މޯލްޑިވްސް އެއާޕޯޓްސް ކޮމްޕެނީ ލިމިޓަޑް (އެމްއޭސީއެލް) އާއި ބައިނަލްއަގުވާމީ އެއާލައިންތަކާ ގުޅިގެންނެވެ.