ސިޔާސީ ޕާޓީތައް ޖޫރިމަނާ ކުރެވޭގޮތަށް ގާނޫނު އިސްލާހުކޮށްފި

ސިޔާސީ ޕާޓީއެއްގެ މެންބަރަކު ގާނޫނާ ހިލާފު ކަމެއް ކޮށްފިނަމަ، އޭނާ ނިސްބަތްވާ ޕާޓީއެއް އެއް ލައްކަ ރުފިޔާއިން ޖޫރިމަނާ ކުރެވޭގޮތަށް ހުށަހެޅި ބިލު މަޖިލީހުން ފާސްކޮށްފިއެވެ.

މި ބިލު ފާސްކުރަން ފެންނަ ކަމަށް 61 މެންބަރުން ވޯޓު ދެއްވި އިރު، 10 މެންބަރުން ވޯޓު ދެއްވީ ފާސްކުރަން ނުފެންނަ ކަމަށެވެ.

ސަރުކާރުގެ ފަރާތުން މި ބިލު މަޖިލީހަށް ހުށަހެޅީ ދިއްދޫ ދާއިރާގެ މެންބަރު އަބްދުއްލަތީފް މުހައްމަދެވެ. ބިލަށް ދެ އިސްލާހެއް ވަނީ އިތުރުކޮށްފައެވެ. އެއީ ޕާޓީއެއް އުވާލި ނަމަވެސް އެ ޕާޓީގެ ނަމާއި ނިޝާނާއި ސިއްކަ އާއި ކުލަ ފަދަ ޕާޓީ ރަމްޒުކޮށްދޭ ތަކެތި ޕާޓީ އުވާލާތާ ފަސް އަހަރު ނުވާ ނަމަ ބޭނުން ނުކުރެވުމާއި، ފަސް އަހަރަކުން އެއް ފަހަރު ގައުމީ ބައްދަލުވުމެއް ނުބޭއްވިޔަސް ޕާޓީ އުވާނުލެވޭ ގޮތަށް ގާނޫނު ބަދަލުކުރުމެވެ.

މި ބިލުގައިވާގޮތުން، ޕާޓީއެއްގެ މެންބަރަކު ގާނޫނާ ހިލާފުވެއްޖެނަމަ، އެ މެންބަރަކު 30،000 ރުފިޔާ އާއި 75،0000 ރުފިޔާގެ އަދަދަކުން ޖޫރިމަނާ ކުރުމުގެ އިތުރުން، އެ މެންބަރަކު ނިސްބަތްވާ ޕާޓީއެއް 100،000 ރުފިޔާއިން ޖޫރިމަނާ ކުރެވޭނެއެވެ.

މީގެއިތުރުން، ސަރުކާރުން ވަނީ މި ގާނޫނުގެ 10 ވަނަ މާއްދާ އުވާލުމަށް ވެސް ހުށަހަޅާފައެވެ. އެ މާއްދާގައި ބުނެފައިވަނީ ޕާޓީގެ ޕްރައިމަރީގައި ވާދަކޮށްފައިވާ މެންބަރަކު، އެ އިންތިހާބުގައި އެހެން އެއްވެސް ހައިސިއްޔަތަކުން ކުރިމަތިލައިގެން ނުވާނެ ކަމަށެވެ. ނަމަވެސް މި މާއްދާއަކީ ސުޕްރީމް ކޯޓުން ގާނޫނުއަސާސީއާ ހިލާފު ކަމަށް ކަނޑައަޅާފައިވާ މާއްދާއެކެވެ.

މި އިސްލާހުތަކާއެކު ސިޔާސީ ޕާޓީތަކުގެ މައްޗަށް އިތުރު ގާނޫނީ ޒިންމާތަކެއް އަންނާނެ ކަމަށް ބެލެވެއެވެ. އަދި ޕާޓީތަކުން ގާނޫނާ ހިލާފު ޢަމަލުތައް ހިންގުމަށް ހުރަސްއެޅި، އިތުރު ޒިންމާދާރުކަމާއެކު ޕާޓީތައް ހިންގުމަށް މަގުފަހިވާނެ ކަމަށް ސަރުކާރުން އުންމީދުކުރެއެވެ.