މީޑިއާ ރެގިއުލޭޓްކުރާ އައު ކޮމިޝަނެއް އުފެއްދުމަށް ބިލެއް ހުށަހަޅަނީ

މީޑިއާ ރެގިއުލޭޓް ކުރުމަށް އައު ކޮމިޝަނެއް އުފެއްދުމަށް ހުށަހަޅާ ބިލެއްގެ ފުރަތަމަ ކިޔުން އިއްވުން ރައްޔިތުންގެ މަޖިލީހުގެ މިއަދުގެ ޖަލްސާއަށް ތާވަލުކޮށްފިއެވެ.

މި ބިލު ހުށަހަޅުއްވާފައިވަނީ ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރެވެ.

'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލު' ގެ ނަމުގައި ހުށަހަޅާފައިވާ މި ބިލުގެ ދަށުން މިހާރު މީޑިއާ ރެގިއުލޭޓް ކުރުމަށް އޮންނަ މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އާއި މޯލްޑިވްސް މީޑިއާ ކައުންސިލް (އެމްއެމްސީ) އުވާލައި، އެއް މުއައްސަސާއަކަށް އެ މެންޑޭޓު ދޭން ވަނީ ހުށަހަޅާފައެވެ.

މި ބިލުގައިވާ ގޮތުން އުފައްދާ އައު ކޮމިޝަން އެކުލެވިގެންވަނީ ހަތް މެންބަރުންގެ މައްޗަށެވެ. އޭގެ ތެރެއިން ހަތަރު މެންބަރުން އައްޔަންކުރާނީ ރައީސުލްޖުމްހޫރިއްޔާއެވެ. އަނެއް ތިން މެންބަރުން އިންތިޚާބުކުރާނީ މީޑިއާތަކުންނެވެ. މިގޮތަށް އޮތުމުން ސަރުކާރަށް މި ކޮމިޝަންގެ ފުރިހަމަ އަޣުލަބިޣުލަބިއްޔަތު އޮންނާނެއެވެ.

ކޮމިޝަންގެ ރައީސް އާއި ނައިބު ރައީސް އައްޔަންކުރުމުގެ ބާރު ވެސް ދީފައިވަނީ ރައީސުލްޖުމްހޫރިއްޔާއަށެވެ. ކޮމިޝަންގެ މެންބަރުންގެ މަޤާމުގެ މުއްދަތަކީ ފަސް އަހަރެވެ. އަދި ވިދިވިދިގެން ނުވަތަ އެނޫން ވެސް ގޮތަކަށް ފަސް އަހަރުގެ ދެ ދައުރަށް ވުރެ ގިނަ ދުވަހު މެންބަރުކަމުގައި ނުހުރެވޭނެ ކަމަށް ބިލުގައި ބަޔާންކޮށްފައިވެއެވެ.

މި ބިލު ހުށަހަޅާ ސަބަބުތަކުގެ ތެރޭގައި ރާއްޖޭގައި ނޫސްވެރިކަމުގެ މިނިވަންކަން ކުރިއަރުވައި ތަރައްޤީކުރުމާއި، ނޫސްވެރިންނަށް ޤާނޫނުއަސާސީން ލިބިދޭ ޙައްޤުތައް ޒިންމާދާރުކަމާއެކު ބޭނުންކުރާކަން ކަށަވަރުކުރުން ހިމެނެއެވެ. އަދި މީޑިއާތަކާއި ނޫސްވެރިން ޢަމަލުކުރާނެ ހަމަތަކާއި އުސޫލުތައް ކަނޑައެޅުމަށް ވަކި މުއައްސަސާއެއް އުފެއްދުމަށް ވެސް ބިލުގައި ބަޔާންކޮށްފައިވެއެވެ.

ބިލުގައި ހިމެނޭ އެހެނިހެން މުހިންމު ކަންތައްތަކުގެ ތެރޭގައި ބްރޯޑްކާސްޓަރުންނާއި ނޫސްތައް ބޮޑެތި އަދަދުތަކުން ޖޫރިމަނާކުރުމާއި، ލައިސަންސް ބާޠިލުކުރުމަށް ކޯޓަށް ހުށަހެޅުމުގެ ގެ ބާރު ކޮމިޝަނަށް ދިނުން ހިމެނެއެވެ. މީގެ އިތުރުން ނޫސްވެރިންނަށް ވެސް ފިޔަވަޅު އެޅުމުގެ ބާރު ކޮމިޝަނަށް ދީފައިވެއެވެ.