ޔުއެފާ ޗެމްޕިއަންސް ލީގުގައި އިންޓަ މިލާން އާސެނަލް އަތުން މޮޅުވެއްޖެ

އަސެނަލާއި އިންޓާރ ބައްދަލުކުރި މެޗުގެ ތެރެއިން

ޔުއެފާ ޗެމްޕިއަންސް ލީގުގެ ރޭ ކުޅުނު މެޗުގައި އިންޓަ މިލާން އާސެނަލް އަތުން 1-0 އިން މޮޅުވެފައެވެ.

އިންޓަގެ މޮޅުވުމުގެ ލަނޑު ޖެހީ ފުރަތަމަ ހާފުގެ އިތުރު ވަގުތުގައި ހަކަން ޗަނޮނޮގްލޫ އެވެ. އެއީ އިންޓަގެ މަހުދީ ތަރޭމީ ބޯޅަހިފައިގެން ދިޔުމުގެ ތެރޭގައި އާސެނަލްގެ މިކޭލް މެރީނޯގެ އަތުގައި ބޯޅަ ޖެހުމުން ލިބުނު ޕެނަލްޓީއަކުންނެވެ.

މި މެޗުގައި އާސެނަލުން ވަނީ ޕެނަލްޓީއަކަށް ވަރަށް ބޮޑަށް އެޕީލްކޮށްފައެވެ. އެއީ އާސެނަލްގެ މެރީނޯ ބޮލުން ޖަހަން އެރި ބޯޅައެއްގައި އިންޓަގެ ކީޕަރު ޔެން ސޮމާ ފައުލުކުރި ކަމަށް ބުނެއެވެ. ނަމަވެސް ވީއޭއާރުން ބެލުމަށްފަހުވެސް އެއީ ޕެނަލްޓީއެއް ކަމަށް ނުނިންމައެވެ.

އާސެނަލްގެ ކޯޗު މިކޭލް އާޓެޓާ ވަނީ ރެފްރީންގެ ނިންމުންތައް އެކި ފަހަރު އެކި ގޮތަށް ހުންނަ ކަމަށާއި މީގެ ގެއްލުން ކުރިމަތިވަނީ ޓީމުތަކަށް ކަމަށް ބުނެފައެވެ. މި މޮޅާ އެކު އިންޓަ ވަނީ ހަތަރު މެޗުން 10 ޕޮއިންޓް ހޯދައި ފަސްވަނައަށް ޖެހިލާފައެވެ. އަދި އާސެނަލް އޮތީ ހަތަރު މެޗުން ހަތް ޕޮއިންޓާއެކު 12 ވަނައިގައެވެ.

މީގެ އިތުރުން ރޭގެ އެހެން މެޗެއްގައި ޕީއެސްޖީ ދަނޑުގައި އެތުލެޓިކޯ މެޑްރިޑުން ވަނީ 2-1 އިން މޮޅުވެފައެވެ. އަދި ބާސެލޯނާ ވަނީ ރެޑްސްޓާ ބެލްގްރޭޑް އަތުން 5-2 އިން މޮޅުވެފައެވެ.

ޔޫއެފާ ޗެމްޕިއަންސް ލީގު