ކުރީގެ މަޝްހޫރު ވިޔަފާރިވެރިޔާ ކުވާ މުހައްމަދު މަނިކު އަވަހާރަވެއްޖެ

މުހައްމަދު މަނިކު ނުވަތަ ކުވާ މޮހޮދޭ

ރާއްޖޭގެ މަޝްހޫރު ވިޔަފާރިވެރިޔާ މުހައްމަދު ޔޫސުފް (ކުވާ މުހައްމަދު މަނިކު ނުވަތަ ކުވާ މޮހޮދޭ) މިއަދު އުމުރުން 78 އަހަރުގައި އަވަހާރަވެއްޖެއެވެ.

އޭނާ އަވަހާރަވެފައިވަނީ އައިޖީއެމްއެޗްގައި ފުއްޕާމޭގެ ބައްޔަކަށް ފަރުވާ ހޯއްދަވަމުން ގެންދަވަނިކޮށެވެ.

މުހައްމަދު މަނިކަކީ 1970 އަދި 1980ގެ އަހަރުތަކުގައި ރާއްޖޭގައި އެންމެ ފުޅާ ދާއިރާއެއްގައި ޝިޕިންގ ވިޔަފާރި ކުރި ފަރާތެވެ. އެ ދުވަސްވަރު އޭނާގެ އެހީގައި ގިނަ ބަޔަކަށް ސިއްހީ ފަރުވާ ހޯދަން އެހީތެރިކަން ފޯރުކޮށްދެއްވިއެވެ. އޭނާއަކީ ހަޔަރ އެޑިއުކޭޝަން މިނިސްޓަރު ޑރ. މަރިޔަމް މާރިޔާ އަދި ކަސްޓަމްސްގެ ކުރީގެ ކޮމިޝަނަރު ޔޫސުފް މާނިއުގެ ބައްޕައެވެ.

މުހައްމަދު ޔޫސުފްގެ އަވަހާރަވުމާ ގުޅިގެން ރައީސް މުހައްމަދު މުއިއްޒު ވަނީ އާއިލާއަށް ތައުޒިޔާ ދަންނަވާފައެވެ. ރައީސް ވިދާޅުވެފައިވަނީ އޭނާއަކީ ވިޔަފާރީގެ ދާއިރާއިން ބޮޑެތި ޚިދުމަތްތަކެއް ގައުމަށް ކޮށްދެއްވާފައިވާ ބޭފުޅެއް ކަމަށާއި، ދަރުމަވެރި އެތައް އެހީތަކެއް ވަކިވަކި ފަރުދުންނަށާއި ޖަމާއަތްތަކަށް ފޯރުކޮށްދެއްވާފައިވާ އިހްސާންތެރިއެއް ކަމަށެވެ.

މުހައްމަދު ޔޫސުފްގެ މައްޗަށް ކަށުނަމާދު ކުރުމަށް ހަމަޖެހިފައި ވަނީ މިރޭ އިޝާ ނަމާދަށްފަހު އިސްލާމީ މަރުކަޒުގައެވެ.

ރައީސް ޑރ މުޙައްމަދު މުޢިއްޒު