ސަރުކާރުގެ ޓެކްސީ ލައިން ހިދުމަތުން ޓެކްސީ ވިޔަފާރިވެރިންނަށް ގެއްލުމެއް ނުވާނެ: މިނިސްޓަރު އަމީން

މާލެ ސަރަހައްދުގައި ސަރުކާރުގެ ކުންފުންޏަކުން ޓެކްސީ ހިދުމަތް ދިނުމަށް ނިންމި ނަމަވެސް، މިހާރު ޓެކްސީގެ ވިޔަފާރީގައި އުޅޭ ފަރާތްތަކަށް އޭގެ ނޭދެވޭ އަސަރެއް ނުކުރާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން މިއަދު ވިދާޅުވެއްޖެއެވެ.

ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރު އަމީން ވިދާޅުވީ، މިހާރު ޓެކްސީގެ ވިޔަފާރި ކުރާ ފަރާތްތަކުގެ އާމްދަނީއަށް ގެއްލުން ނުވާނެ ގޮތަކަށް އައު ނިޒާމު ބައްޓަން ކުރާނެ ކަމަށެވެ. އަދި މިކަމުގެ ޔަގީންކަން އެ ވިޔަފާރީގައި އުޅޭ ފަރާތްތަކަށް ކުރިން ވެސް ދެވިފައިވާ ކަމަށް އޭނާ ފާހަގަކުރެއްވިއެވެ.

މިނިސްޓަރު އަމީން އިތުރަށް ވިދާޅުވީ، ރައްޔިތުންގެ އާމްދަނީގެ ހާލަތަށް ބަލާއިރު ޓެކްސީގެ ފީތައް ބޮޑުކުރުމަކީ ވެސް މިވަގުތު ކުރެވޭނެ ކަމެއް ނޫން ކަމަށެވެ. އޭގެ ބަދަލުގައި ޓެކްސީގެ ހިދުމަތް ދޭ މިންގަނޑުތައް މަތިކުރުމަށް މަސައްކަތްކުރާނެ ކަމަށް އޭނާ ވިދާޅުވިއެވެ.

ސަރުކާރުން ޓެކްސީ ލައިންގެ ހިދުމަތެއް ތަޢާރަފްކުރަން ނިންމާފައިވަނީ މިހާރު ޓެކްސީގެ ހިދުމަތް ލިބެމުންދާ މިންވަރު އާންމުންގެ ޑިމާންޑާ އެއްވަރަށް ނުވާތީ ކަމަށް މިނިސްޓަރު އަމީން ވިދާޅުވިއެވެ. އަދި މި ހިދުމަތް ފޯރުކޮށްދިނުމުގައި ބިދޭސީންނަކަށް ޓެކްސީ ޑްރައިވަރުކަމެއް ނުކުރެވޭނެ ކަމަށާއި، ޑްރައިވަރުންނަށް ގަޑިއިރަކަށް 100 ރުފިޔާއަށްވުރެ ދަށް އަގެއް ނުދޭނެ ކަމަށް ވެސް އޭނާ ވިދާޅުވިއެވެ.

މި އައު ނިޒާމުގެ ދަށުން، ޓެކްސީ ލައިންގެ 50 ޕަސެންޓް މުވައްޒަފުންނަކީ ދާއިމީ މުވައްޒަފުންގެ ގޮތުގައި ތިބޭނެ ކަމަށާއި، ބާކީ 50 ޕަސެންޓް ސްލޮޓްތައް ދޫކުރާނީ ކޮންމެ ދުވަހަކު އެކި ގަޑިތަކުގައި ޓެކްސީ ދުއްވަން ބޭނުންވާ ފަރާތްތަކަށް ކަމަށް މިނިސްޓަރު އަމީން ހާމަކުރެއްވިއެވެ. މީގެ އިތުރުން، ޓެކްސީ ލައިންގައި މަސައްކަތްކުރި ނަމަވެސް އަމިއްލަ ޓެކްސީ ވެސް ދުއްވޭނެ ކަމަށް އޭނާ ވިދާޅުވިއެވެ.