ސަރުކާރުގެ އަމާޒަކީ މަސް ރައްކާކުރެވޭ މިންވަރު 25,000 ޓަނަށް އިތުރުކުރުން: މިނިސްޓަރު ޝިޔާމް

މި ސަރުކާރުގެ ފުރަތަމަ ފަސް އަހަރު ނިމޭއިރު ރާއްޖޭގައި މަސް ފިނިކޮށް ރައްކާކުރެވޭ މިންވަރު 8,500 ޓަނުން 25,000 ޓަނަށް އިތުރު ކުރުމަށް އަމާޒު ހިފާފައިވާ ކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެ އެވެ.

ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައި ވާހަކަދައްކަވަމުން، މިނިސްޓަރު ޝިޔާމް ވިދާޅުވީ މަސްވެރިކަމުގެ ސިނާއަތަށް ދިމާވެފައިވާ އެންމެ ބޮޑު އެއް ގޮންޖެހުމަކީ މަސް ރައްކާކުރާނެ ކެޕޭސިޓީ މަދުވުން ކަމަށެވެ. އެކަށީގެންވާ ސްޓޯރޭޖު ކެޕޭސިޓީ ނެތުމަކީ ރާއްޖެއިން ބޭނުންވާ އަގުގައި މަސް ބޭރު ކުރުމަށް އޮތް ބޮޑު ހުރަހެއް ކަމަށް ވެސް މިނިސްޓަރ ފާހަގަ ކުރެއްވިއެވެ. މިހާރު މިފްކޯއަށް ކިރާ މަހުގެ ބޮޑު އިންސައްތައެއް ރޯމަހުގެ ގޮތުގައި ބޭރުކުރަން ޖެހޭ ކަމަށާއި، އެހެންކަމުން މަސް ވިއްކަން ޖެހެނީ ރާއްޖެއިން ބޭނުންވާ އަގަށްވުރެ ދަށް އަގުގައި ކަމަށް އޭނާ ފާހަގަކުރެއްވިއެވެ.

މި މައްސަލަ ހައްލުކުރުމަށް، ރާއްޖޭގެ ހުރިހާ ސަރަހައްދެއްގައި މަސް ރައްކާކުރާނެ ސްޓޯރޭޖު ގާއިމް ކުރުމަށް ސަރުކާރުން މަސައްކަތް ކުރަމުންދާ ކަމަށް މިނިސްޓަރު ވިދާޅުވިއެވެ. މީގެ ތެރޭގައި ގދ. ތިނަދޫ، ގދ. ފިޔޯރީ، ގއ. ކޫއްޑޫ، ސ. ހުޅުދޫ، ފ. ނިލަންދޫ، މ. މުލަކު، ހއ. އިހަވަންދޫ އަދި ޅ. ފެލިވަރުގައި އައު ސްޓޯރޭޖު ފެސިލިޓީތައް ގާއިމްކުރުން ހިމެނެއެވެ.

މީގެ އިތުރުން، މަސް ޕްރޮސެސް ކުރުމުގެ ކެޕޭސިޓީ ވެސް އިތުރުކުރުމަށް ރޭވިފައިވާ ކަމަށް ޝިޔާމް ވިދާޅުވިއެވެ. މިގޮތުން ޅ. ފެލިވަރު، ފ. ނިލަންދޫ އަދި ގދ. ފިޔޯރީގައި އައު ޕްރޮސެސިން ފެސިލިޓީތައް ގާއިމްކުރެވޭނެއެވެ. މި މަސައްކަތްތަކާއެކު، ރާއްޖޭގެ މަސްވެރިކަމުގެ ސިނާއަތުން ލިބޭ އާމްދަނީ ދެގުނަ ނުވަތަ ތިން ގުނަ އިތުރުވާނެ ކަމަށް މިނިސްޓަރު އުންމީދު ކުރައްވައެވެ.