ސަރުކާރުގެ ކުންފުނިތަކުން އަހަރަކު ދެފަހަރު ބަޖެޓު އޮޑިޓް ހަދަންޖެހޭ ގޮތަށް ހަމަޖައްސައިފި

ސަރުކާރުގެ ކުންފުނިތަކާއި ސަރުކާރު ބައިވެރިވާ ކުންފުނިތަކުގެ އިތުރުން، ވިޔަފާރި އުސޫލުން ހިންގާ ސަރުކާރުގެ ތަންތަނުން، މަދުވެގެން އަހަރަކު ދެ ފަހަރު ބަޖެޓު ޕްރޮސެސް އޮޑިޓެއް ހަދަންޖެހޭ ގޮތަށް ހަމަޖައްސައިފިއެވެ. މި ނިންމުން ނިންމާފައިވަނީ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިންނެވެ.

ޕީސީބީގެ ރައީސް ހަމްދީ އަގީލް ސޮއިކުރައްވައި މިއަދު ނެރުނު ސާކިއުލާއެއްގައި ވަނީ، އެސްއޯއީތަކުން އަހަރީ ބަޖެޓު އެކުލަވައިލަންޖެހޭ އުސޫލެއް އާންމުކޮށްފައެވެ. މި އުސޫލު އެކުލަވާލާފައިވަނީ ބަޖެޓު އެއްހަމައަކުން ދިރާސާ ކުރުމުގައި ލުއިފަސޭހަ ގޮތްތަކެއް ކަނޑައެޅުމަށް ކަމަށް ބަޔާންކޮށްފައިވެއެވެ.

އާ އުސޫލުގެ ދަށުން، މުވައްޒަފުންގެ ޚަރަދު އާމްދަނީގެ 30 ޕަސަންޓަށްވުރެ އިތުރުނުވުމާއި، މަޖުބޫރު ހާލަތެއްގައި ނޫނީ ބަޖެޓަށް ބަދަލު ނުގެނައުން ހިމެނެއެވެ. އަދި ބަދަލު ގެންނަން ޖެހިއްޖެނަމަ، ސަބަބު ބަޔާންކޮށް ފިނޭންސް މިނިސްޓްރީއަށް ހުށަހަޅަންޖެހޭނެއެވެ.

ޕީސީބީން ބުނެފައިވަނީ 2025 ވަނަ އަހަރުގެ ބަޖެޓު އެކުލަވާލުމުގެ މަރުހަލާ ކުންފުނިތަކުން މިހާރު ފަށާފައިވާތީ، މި އުސޫލާ އެއްގޮތްވާ ގޮތުގެ މަތީން ބަޖެޓާ ގުޅޭ ލިޔެކިޔުންތައް އެކުލަވައިލަން ފަށާނީ 2026 ވަނަ އަހަރަށް ބަޖެޓު އެކުލަވައިލާއިރު ކަމަށެވެ. އެހެންނަމަވެސް، މި އުސޫލު ޝާއިއުކުރާ ދުވަހުން ފެށިގެން ބަޖެޓު ހާމަކުރުމުގެ މަސައްކަތާއި، ބަޖެޓު ރިވިއު ފޮނުވުމުގެ މަސައްކަތް މި އުސޫލާ އެއްގޮތަށް ކުރިއަށް ގެންދަންޖެހޭނެއެވެ.

މި އައު އުސޫލުތަކަކީ ދައުލަތުގެ ކުންފުނިތަކުގެ މާލީ ހިންގުން ހަރުދަނާކޮށް، ޒިންމާދާރުކަން އިތުރުކުރުމަށް އެޅޭ މުހިންމު ފިޔަވަޅެއް ކަމަށް ބެލެވެއެވެ.