ބުރައިޓަން އަތުން މޮޅުވެ ލިވަޕޫލް ލީގުގެ އެއްވަނައަށް އަރައިފި

އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން މެންޗެސްޓާ ސިޓީ އާއި އާސެނަލް ބަލިވުމުގެ ފައިދާނަގައި، ލިވަޕޫލުން ލީގުގެ އެއް ވަނައިގައި ލީޑުހޯދައިފި އެވެ.

ލިވަޕޫލް މިހާރު އެއްވަނައިގައި އޮތީ 10 މެޗުން 25 ޕޮއިންޓް ހޯދައިގެންނެވެ.

ރޭ ކުޅެވުނު ނިއުކާސަލް ޔުނައިޓެޑާއި އާސެނަލް ބައްދަލުކުރި މެޗުން އާސެނަލް ބަލިވެފައި ވަނީ 1-0 ގެ ނަތީޖާއަކުންނެވެ. ނިއުކާސަލްގެ ލަނޑު މެޗުގެ 12 ވަނަ މިނިޓްގައި ޖެހީ އަލެކްސަންޑަ އިސާކް އެވެ.

އެންމެފަހުގެ ޗެމްޕިއަން މެންޗެސްޓަރ ސިޓީ 2-1 ން ބޯންމައުތު އަތުން ބަލިވެފައިވާއިރު، ސިޓީ ކޮޅަށް ބޯންމައުތުން ލަނޑުތައް ޖެހީ، އެންޓޮއިން ސެމެންޔޯ އާއި އެވަނިލްސަން އެވެ. މެޗު ނިމެން އަށް މިނިޓަށް ވެފައި ވަނިކޮށް، ސިޓީގެ ޑިފެންޑަރު، ޖޮސްކޯ ގްވާޑިއޯލް ލަނޑެއް ޖަހައި އެ ޓީމަށް އުންމީދެއް ހޯދައިދިނެވެ. އެކަމަކު، ބޯންމައުތުން ވަނީ ރަނގަޅަށް ޑިފެންސްކޮށް ލީޑު ހިފަހައްޓައި މެޗުން މޮޅުވެފަ އެވެ.

ލިވަޕޫލް ދަނޑުގައި ކުޅެވުނު ފޯރި ގަދަ މެޗުގައި ބުރައިޓަންގެ ފާޑީ ކަޑިއޯގްލޫގެ ގޯލަކުން ލީޑު ހޯދާފައި ވަނިކޮށް  މެޗުގެ 69 ވަނަ މިނިޓްގައި ކޯޑީ ގަކްޕޯ ނަތީޖާ ހަމަހަމަކުރި އެވެ. އޭގެ ދެ މިނިޓް ފަހުން، ލިވަޕޫލް މޮޅުވި ލަނޑު ޖެހީ މުހައްމަދު ސަލާހު އެވެ.

ރޭގެ މެޗުތަކަށް ފަހު އެންމެފަހުގެ ޗެމްޕިއަން މެންޗެސްޓާރ ސިޓީ ވަނީ 10 މެޗުން ލިބުނު 23 ޕޮއިންޓާއި އެކު ތާވަލުގެ ދެވަނައަށް ވެއްޓިފައެވެ. ތިން ވަނައިގައި އޮތީ މިރޭ ވެސްޓް ހޭމް ޔުނައިޓެޑް އަތުން 3-0 އިން މޮޅުވި ނޮޓިންހަމް ފޮރެސްޓް އެވެ. އެ ޓީމަށް ވަނީ 10 މެޗުން 19 ޕޮއިންޓް ލިބިފަ އެވެ. އާސެނަލް ހަތަރެއްގައި އޮތީ 10 މެޗުން 18 ޕޮއިންޓް ހޯދައިގެންނެވެ.