ކޮރެއާއިން ރަޝިއާއަށް އަސްކަރީ އެހީތެރިކަން ފޯރުކޮށްދޭނެކަމަށް ބުނެ އެމެރިކާއަށް ގޮންޖަހައިފި

ރަޝިއާއަށް ސިފައިންނާއި ހަތިޔާރު ފޯރުކޮށްދޭނެކަމަށް އުތުރު ކޮރެއާގެ ޚާރިޖީ ވަޒީރާ ޗުވީ ޗުން ހުވާއި ރަސްމީކޮށް ހާމަކުރައްވައިފިއެވެ.

މޮސްކޯގައި ރަޝިއާގެ ޚާރިޖީ ވަޒީރު ސަރްގީ ލާވްރޯވްއާ ބައްދަލުކުރެއްވުމަށްފަހު ދެއްވި ބަޔާނެއްގައި އެކަމަނާ ވިދާޅުވީ ރަޝިއާ ހަނގުރާމަކުރަނީ އެމެރިކާގެ "ޖައްބާރުވަންތަކަމާއި" "ނުލަފާކަމާ" ދެކޮޅަށް ކަމަށެވެ.

އުތުރު ކޮރެއާއިން މިފަދަ ނިންމުމެއް ނިންމާފައިވަނީ ރަޝިއާއާއެކު ދާދިފަހުން ވެފައިވާ ކޮމްޕްރިހެންސިވް ޕާޓްނަރޝިޕް އެއްބަސްވުމުގެ ދަށުންނެވެ. މިއީ ނޭޓޯގެ ގައުމުތަކުގެ މެދުގައި އޮންނަ ބާވަތުގެ އެއްބަސްވުމެކެވެ.

އުތުރު ކޮރެއާއިން މިކަން ހާމަކޮށްފައިވަނީ އެގައުމުން ރަޝިއާއަށް 12 ހާސް ސިފައިންނާއި ގިނަ އަދަދެއްގެ ހަތިޔާރު ފޮނުވިކަމުގެ ޚަބަރުތަކެއް ފެތުރިފައިވަނިކޮށެވެ. މީގެ އިތުރުން އުތުރު ކޮރެއާއިން ވަނީ އެމެރިކާގެ ކޮންމެ ތަނަކަށްވެސް ފޯރާފަދަ ނިއުކްލިއަރ ވޯހެޑް އުފުލުމުގެ ގާބިލްކަން ލިބިފައިވާ އިންޓަރކޮންޓިނެންޓަލް ބެލިސްޓިކް މިސައިލެއް އުފައްދައި ދައްކާލާފައެވެ.

މި ކަންތައްތަކާ ގުޅިގެން އެމެރިކާގެ ދިފާއީ ވުޒާރާ ޕެންޓަގަނުން ވަނީ ކަންބޮޑުވުން ފާޅުކޮށްފައެވެ. އެމެރިކާއިން ބުނެފައިވަނީ މިއީ ރަޝިއާގެ މަތީ ފެންވަރުގެ އަސްކަރީ އަދި މަދަނީ ޓެކްނޮލޮޖީތައް އުތުރު ކޮރެއާއަށް ލިބިގެންދާނެ ކަމެއް ކަމަށެވެ.

އުތުރު ކޮރެއާއިން މިފަދަ ނިންމުމެއް ނިންމުމަކީ ޔުކްރެއިން ހަނގުރާމައިގައި ރަޝިއާއަށް އަސްކަރީ ގޮތުން އެހީތެރިވާނެކަމަށް ދުނިޔޭގެ ގައުމަކުން ރަސްމީކޮށް ހާމަކުރި ފުރަތަމަ ފަހަރެވެ. މިކަމުގެ ސަބަބުން ބައިނަލްއަޤްވާމީ މައިދާނުގައި އިތުރު ގޮންޖެހުންތަކެއް ކުރިމަތިވެދާނެކަމަށް ބެލެވެއެވެ.