ސައުދީ ސުޕަ ލީގުގައި އަލް ހިލާލްއާއި އަލް ނަސްރުގެ ކުރިމަތިލުން އެއްވަރު

ސައުދީ އަރަބިއްޔާގެ ސުޕަ ލީގުގައި ވާދަވެރި ދެ ޓީމު ކަމަށްވާ އަލް ހިލާލްއާއި އަލް ނަސްރު ބައްދަލުކުރި މެޗު 1-1 ގެ ނަތީޖާއަކުން އެއްވަރުވެއްޖެއެވެ.

މިއީ މި ލީގުގައި އަލް ހިލާލް މެޗަކުން މޮޅުނުވެ ތިން ޕޮއިންޓް ގެއްލުނު ފުރަތަމަ މެޗެވެ. މީގެ ކުރިން އެ ޓީމު ކުޅުނު 8 މެޗުންވެސް ވަނީ މޮޅުވެފައެވެ.

މެޗުގެ ފުރަތަމަ މިނިޓުގައި އަލް ނަސްރުގެ އެންޑަރސަން ޓަލިސްކާ ވަނީ ލަނޑެއް ޖަހާ އެ ޓީމަށް ކުރި ހޯދައިދީފައެވެ. ނަމަވެސް، އަލް ހިލާލްއިން މި މެޗުގައި ލަނޑު ޖަހާ އެއްވަރުކޮށްފައިވަނީ މެޗުގެ 77 ވަނަ މިނިޓުގައި ސަރބިޔާގެ މިލިންކޮވިޗް ކާމިޔާބުކޮށްދިން ލަނޑުންނެވެ.

މި މެޗާ ހަމައަށް ލީގުގައި ކުޅުނު 9 މެޗުން އަލް ހިލާލަށް 25 ޕޮއިންޓާއެކު ތާވަލުގެ އެއްވަނަ ލިބިފައިވާއިރު، އަލް ނަސްރަށް 9 މެޗުން ލިބިފައިވަނީ 19 ޕޮއިންޓާއެކު ތާވަލުގެ ތިންވަނައެވެ. ދެވަނައިގައި އޮތް އަލް އިއްތިހާދަށް 9 މެޗުން ވަނީ 24 ޕޮއިންޓް ލިބިފައެވެ.

ނަން މަޝްހޫރު ގިނަ ކުޅުންތެރިންތަކެއް ހިމެނޭ މި ދެ ޓީމުގެ ކުރިމަތިލުމަކީ ސައުދީ ލީގުގައި އެންމެ ގިނަ ބައެއް އިންތިޒާރު ކުރާ އެއް މެޗެވެ. މި މެޗުގެ ނަތީޖާއާ ގުޅިގެން ލީގު ތާވަލުގައި އަލް ހިލާލްގެ ލީޑު ކުޑަވެ، ވާދަވެރިކަން އިތުރުވެގެންދާނެ ކަމަށް ބެލެވެއެވެ.