މަސްވެރިންނަށް 48 ގަޑިއިރުން ފައިސާ ދޭންވި ވައުދު ފުއްދާނަން: ޝިޔާމް

ފިޝަރީޒް މިނިސްޓަރ އަހްމަދު ޝިޔާމް

މަސްކިރާތާ 48 ގަޑިއިރުގެ ތެރޭގައި މަސްވެރިންނަށް ފައިސާ ދިނުމަށް ސަރުކާރުން ވެފައިވާ ވައުދު ފުއްދާނެ ކަމަށް ފިޝަރީޒް މިނިސްޓަރ އަހްމަދު ޝިޔާމް ވިދާޅުވެއްޖެއެވެ.

މިއަދުގެ މަޖިލިސް ޖަލްސާގައި މަރަދޫ ދާއިރާގެ މެންބަރު އަހްމަދު ދީދީގެ ސުވާލަކަށް ޖަވާބު ދެއްވަމުން ޝިޔާމް ވިދާޅުވީ މިއީ ރައީސް މުއިއްޒުގެ ސަރުކާރުން ތަންފީޒުކުރާނެ ވައުދެއް ކަމަށެވެ.

ޝިޔާމް ވިދާޅުވީ މަހުގެ އަގަށް ގެނައި ބަދަލުގެ ސަބަބުން ރައީސް މުއިއްޒުގެ ސަރުކާރު އައިއިރު މަސްވެރިންނަށް 250 މިލިއަން ރުފިޔާ ނުދައްކާ އޮތް ކަމަށާއި، އެ ފައިސާ ބަހަނާއެއް ދެއްކުމެއް ނެތި މި ސަރުކާރުން ދެއްކި ކަމަށެވެ. އަދި މަސްވެރި ސިނާއަތުގައި އޮތް އެންމެ ބޮޑު ގޮންޖެހުމަކީ ކެޕޭސިޓީ ނެތުން ކަމަށްވެސް އޭނާ ފާހަގަކުރެއްވިއެވެ.

މިނިސްޓަރ ޝިޔާމް އިތުރަށް ވިދާޅުވީ އައްޑޫ ސިޓީ ހުޅުމީދޫގެ މަސް ފެކްޓްރީގެ ކެޕޭސިޓީ ބޮޑުކުރުމަށް މިދިޔަ ހަފްތާގައި ފަންޑު ހަމަޖެހިފައިވާ ކަމަށެވެ. މި މަޝްރޫއު 2025 ވަނަ އަހަރުގެ ކުރީކޮޅު ފަށައި، 2026 ވަނަ އަހަރުގެ ކުރީކޮޅު ނިންމާލެވޭނެ ކަމަށް އަންދާޒާކުރާ ކަމަށް އޭނާ ވިދާޅުވިއެވެ.

މި މަޝްރޫއުގެ ދަށުން މިހާރު 1500 ޓަނުގެ މަސް ރައްކާކުރެވޭ ކެޕޭސިޓީ އިތުރު 1000 ޓަނަށް އިތުރުކުރެވޭނެ ކަމަށާއި، 50 ޓަނުގެ ބްރައިން ފްރީޒިންގ ކެޕޭސިޓީ އިތުރުކުރެވޭނެ ކަމަށްވެސް މިނިސްޓަރ ޝިޔާމް ވިދާޅުވިއެވެ. މި ބަދަލުތަކާއެކު މަސްވެރިކަމުގެ ދާއިރާ އިތުރަށް ކުރިއަރައި، މަސްވެރިންނަށް ލިބޭ އާމްދަނީ އިތުރުވާނެ ކަމަށް ސަރުކާރުން އުންމީދުކުރާ ކަމަށް އޭނާ ވިދާޅުވިއެވެ.

މަސްވެރިކަމާ ބެހޭ ވުޒާރާ މަސްވެރިން ފިޝަރީޒް މިނިސްޓަރ އަޙުމަދު ޝިޔާމް