ގާނޫނަށް އިސްލާހު ގެންނަނީ މުއައްސަސާތަކުން އެދުނުގޮތަށް:އިސްމާއިލް ހަބީބު

އިލެކްޝަންސް ކޮމިޝަން (އީސީ) އާއި އެންޓި ކޮރަޕްޝަން ކޮމިޝަން (އޭސީސީ)ގެ ރައީސް އައްޔަނުކުރުމުގެ ބާރު ރައީސުލްޖުމްހޫރިއްޔާއަށް ދޭ ގޮތަށް ގާނޫނަށް ގެންނަ އިސްލާހަކީ މިނިވަން މުއައްސަސާތަކުން އަމިއްލައަށް ހުށަހަޅާފައިވާ ކަމެއް ކަމަށް ހިއުމަން ރައިޓްސް ކޮމިޝަން (އެޗްއާރުސީއެމް)ގެ މެންބަރު އަދި އިލެކްޝަންސް ކޮމިޝަނުގެ ކުރީގެ ނައިބު ރައީސް އިސްމާއިލް ހަބީބު ރޭ ވިދާޅުވެއްޖެ އެވެ.

އިސްމާއިލް ހަބީބު ވިދާޅުވި ގޮތުގައި މި އިސްލާހަކީ މިދިޔަ އަހަރު އޭސީސީ، އީސީ، އެޗްއާރުސީއެމް އަދި ސިވިލް ސާވިސް ކޮމިޝަން (ސީއެސްސީ) އިން ރައީސުލްޖުމްހޫރިއްޔާއަށާއި މަޖިލީހަށް އަދި އެޓާނީ ޖެނެރަލްއަށް ހުށަހަޅާފައި އޮތް ކަމެކެވެ. މި މަޢުލޫމާތު އޭނާ ހިއްސާކުރެއްވީ އެކްސް (ކުރީގެ ޓްވިޓަރ) މެދުވެރިކޮށް ކުރެއްވި ޕޯސްޓެއްގައެވެ.

އިތުރަށް ހަބީބު ވިދާޅުވެފައިވަނީ މި އިސްލާހަކީ ދުނިޔޭގެ ކުރިއަރާފައިވާ އެމެރިކާ ފަދަ ގައުމުތަކުން ވެސް ޢަމަލުކުރަމުން އަންނަ އުސޫލެއް ކަމަށެވެ. މި ބަޔާނުން އެނގެނީ މިފަދަ އިސްލާހުތައް ގެނައުމަކީ ބައިނަލްއަޤްވާމީ މިންގަނޑުތަކާ އެއްގޮތްވާ ކަމެއް ކަމަށް އޭނާ ދެކެވަޑައިގަންނަވާ ކަމެވެ.

މި ބަޔާން އައިސްފައިވަނީ އޭސީސީ އާއި އީސީގެ ރައީސާއި ނައިބު ރައީސް އައްޔަންކުރުމުގެ ބާރު ރައީސުލްޖުމްހޫރިއްޔާއަށް ލިބޭ ގޮތަށް އިސްލާހު ގެނައުމަށް ސަރުކާރުން ރައްޔިތުންގެ މަޖިލީހަށް ދެ ބިލެއް ހުށަހެޅުމާ ގުޅިގެންނެވެ. މި އިސްލާހުތަކާ ގުޅޭގޮތުން އިދިކޮޅު ފަރާތްތަކުން ވަނީ ކަންބޮޑުވުން ފާޅުކޮށްފައި ވީނަމަވެސް، ހަބީބުގެ ބަޔާނުން ދޭހަވަނީ މިއީ މިނިވަން މުއައްސަސާތަކުގެ އަމިއްލަ ހުށަހެޅުމެއް ކަމެވެ.