އައިޖީއެމްއެޗްގައި ފާޓިލިޓީ ސެންޓަރު ގާއިމްކޮށް، މިއަހަރު އައިވީއެފް ފަށަނީ

އައިޖީއެމްއެޗްގައި ފާޓިލިޓީ ސެންޓަރެއް ގާއިމްކޮށް، މިއަހަރުގެ ތެރޭގައި އައިވީއެފްގެ ޚިދުމަތް ފެށުމަށް ތައްޔާރުވެއްޖެއެވެ.

މާލެ ހޮސްޕިޓަލްސް ގްރޫޕުން ބޭއްވި ނިއުސް ކޮންފަރެންސްގައި، ސީއީއޯ އިބްރާހިމް އަބްދުއްރައްޒާގް ހަލީމް ވިދާޅުވީ ރައީސް ޑރ. މުހައްމަދު މުއިއްޒުގެ ވައުދާ އެއްގޮތަށް ފާޓިލިޓީ ސެންޓަރު ތަރައްގީކޮށް، ކުރިއަށް އޮތް މަދު ދުވަސްތަކުގެ ތެރޭގައި ޚިދުމަތް ދޭން ފަށާނެ ކަމަށެވެ.

މި ސެންޓަރަކީ އައިވީއެފް ހެދޭނެ ގޮތަށް ބޭނުންވާ ހުރިހާ އިކުއިޕްމަންޓާއި ވަސީލަތްތަކާއެކު ގާއިމްކުރެވޭ ފާޓިލިޓީ ސެންޓަރެއް ކަމަށް ހަލީމް ވިދާޅުވިއެވެ. އަދި ދަރިމައިވުމުގެ މައްސަލަތަކަށް ފަރުވާ ދިނުމަށް އައިޖީއެމްއެޗްގައި ވަކި ޚާއްސަ ސެންޓަރެއް ހަދާއިރު، އިންޑިއާގެ އެންޔޫ ހޮސްޕިޓަލާ ގުޅިގެން މިހާރު ވެސް "ނެޝަނަލް ޔޫރޯ ރީނަލް އެންޑް ފާޓިލިޓީ ސެންޓަރު"ގައި ފަރުވާ ދެމުންދާ ކަމަށް ވެސް އޭނާ ވިދާޅުވިއެވެ.

ދަރުމަވަންތައިގެ ޑެޕިއުޓީ ސީއީއޯ ޑރ. ޝާހު މާހިރު ވިދާޅުވީ އެދެވޭ ގޮތެއްގައި މިހާތަނަށް ފާޓިލިޓީ ޚިދުމަތް ފުޅާކުރުމުގެ މަސައްކަތް ނުކުރެވޭ ކަމަށާއި، އެހެން ބަޔަކާ ނުގުޅި އައިޖީއެމްއެޗްގެ އަމިއްލަ މަރުކަޒެއް ހަދަނީ އެ ސަބަބާ ހެދި ކަމަށެވެ. އޭގެ ސަބަބުން ދަރިމައިވުމުގެ ފަރުވާއަށް ބޮޑު ކުރިއެރުމެއް ލިބޭނެ ކަމަށް ވެސް އޭނާ ވިދާޅުވިއެވެ.

ޑރ. ޝާހު އިތުރަށް ވިދާޅުވީ، އައިވީއެފް ހެދުމަށް އެހީދޭނެ ގޮތް ކަނޑައެޅުމަށް އެންސްޕާއިން ހަދާފައިވާ ގައިޑްލައިނަށް ފެތޭ މީހުންނަށް އެ އެހީގެ ދަށުން ފަރުވާ ކުރިއަށް ގެންދެވޭނެ ކަމަށެވެ. މިއީ ދަރިމައިވުމުގެ މައްސަލަތަކަށް ފަރުވާ ހޯދުމަށް ބޭނުންވާ ފަރާތްތަކަށް ލިބޭނެ ބޮޑު ލުޔެއް ކަމަށް ބެލެވެއެވެ.

ރާއްޖޭގައި މި ވަގުތު އައިވީއެފް ހަދައިދެނީ ޓްރީޓޮޕް ހޮސްޕިޓަލުގައި އެކަންޏެވެ. އެތަނުގައި މިދިޔަ މެއި މަހުގެ ތެރޭގައި އައިވީއެފް ފަށައި ފުރަތަމަ ދަރިފުޅު ވިހާފައިވާ ކަން އިއުލާންކޮށް، ޚިދުމަތް ވަރަށް ކާމިޔާބު ކަމަށް އެ ހޮސްޕިޓަލުން ވަނީ ބުނެފައެވެ. އައިޖީއެމްއެޗްގައި މި ޚިދުމަތް ފެށުމުން، ގިނަ ބަޔަކަށް މި ފަރުވާ ލިބުމުގެ ފުރުސަތު އިތުރުވެގެންދާނެ ކަމަށް ބެލެވެއެވެ.