އިނގިރޭސި ރަސްގެފާނު ރާއްޖެ ވަޑައިގަތުމަށް ދަޢުވަތު އަރުވައިފި

އިނގިރޭސިވިލާތުގެ ރަސްގެފާނު ޗާލްސް (ތިނެއް) ރާއްޖެ ވަޑައިގަތުމަށް ދަޢުވަތު އަރުވައިފިއެވެ.

މި ދައުވަތު އަރުވާފައި ވަނީ ކޮމަންވެލްތު ގައުމުތަކުގެ އިސްވެރިންގެ 27 ވަނަ ބައްދަލުވުމުގައި، ބައިވެރިވެ ވަޑައިގަންނަވަމުން ގެންދަވާ ރާއްޖޭގެ ނައިބު ރައީސް ހުސައިން މުޙައްމަދު ލަތީފް އިނގިރޭސިވިލާތުގެ ރަސްގެފާނު ޗާލްސް އާއި ބައްދަލުކޮށްލެއްވުމުގެ ތެރޭގައެވެ.

ނައިބު ރައީސް އެކކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ރަސްގެފާނާ ބައްދަލުވުމަކީ ލިބުނު ޝަރަފެއް ކަމަށެވެ. އަދި ރައީސް ޑރ. މުޙައްމަދު މުޢިއްޒުގެ ފަރާތްޕުޅުން ވެސް ރާއްޖެއަށް ވަޑައިގަތުމަށް ރަސްގެފާނަށް ދަޢުވަތު އަރުވައިފައިވާ ކަމަށް ވިދާޅުވިއެވެ.

އިނގިރޭސިވިލާތުގެ ރަސްކަންކުރެއްވި ބޭފުޅަކު އެންމެ ފުރަތަމަ އަދި މިހާތަނަށް ކުރެއްވި ހަމައެކަނި ދަތުރުފުޅު ރާއްޖެއަށް ކުރެއްވީ ޗާލްސްގެ މަންމާފުޅު ރާނީ އެލިޒަބަތު ދެވަނައެވެ. އެއީ 1972 ވަނަ އަހަރު، މީގެ 52 އަހަރު ކުރިންނެވެ.

މިހާރު ސަމޯއާގައި ކުރިއަށްދާ މި ބައްދަލުވުމުގައި ކޮމަންވެލްތު ގައުމުތަކުގެ އިސްވެރިން ބައިވެރިވެވަޑައިގެންފައިވެއެވެ. ކޮމަންވެލްތުގެ އެންމެ އިސްވެރިޔާއަކީ އިނގިރޭސިވިލާތުގެ ރަސްގެފާނު ޗާލްސެވެ. މި ބައްދަލުވުން ބާއްވަނީ ކޮންމެ ދެ އަހަރަކުން އެއް އަހަރު، މެންބަރު ގައުމުތަކުގެ ތެރެއިން އެކި ފަހަރު އެކި ގައުމުގައެވެ.