ރާއްޖެއަށް 1.6 މިލިއަން ފަތުވެރިން ޒިޔާރަތްކޮށްފި، އެންމެ ކުރީގައި ޗައިނާ އާއި ރަޝިއާ

ސަރުކާރުގެ އަމާޒަކީ މިއަހަރު ހުސްވުމުގެ ކުރިން 2 މިލިއަން ފަތުރުވެރިން ގެނައުން

މި އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު 1.6 މިލިއަނަށް އަރައިފި އެވެ.

ޓޫރިޒަމް މިނިސްޓްރީގެ އެންމެ ފަހުގެ ތަފާސްހިސާބުތަކުން ދައްކާ ގޮތުގައި މިދިޔަ ބުދަ ދުވަހުގެ ނިޔަލަށް 1،614،676 ފަތުރުވެރިން ރާއްޖެ ޒިޔާރަތްކޮށްފައިވެ އެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 9.4 އިންސައްތައިގެ ކުރިއެރުމެކެވެ.

ސަރުކާރުގެ އަމާޒަކީ މި އަހަރުގެ ނިޔަލަށް ދެ މިލިއަން ފަތުރުވެރިން ހަމަކުރުމެވެ. މި އަމާޒަށް ވާސިލުވުމަށް އިތުރު 385،324 ފަތުރުވެރިން ރާއްޖެއަށް ޒިޔާރަތްކުރަން ޖެހެ އެވެ. މިހާތަނަށް އައިއިރު ރާއްޖޭގެ އެއްވަނަ މާކެޓެއްގެ ގޮތުގައި އޮތީ ޗައިނާ އެވެ. އޭގެ ފަހަތުން ރަޝިއާ އާއި އިނގިރޭސިވިލާތް ވަނީ ދެވަނަ އަދި ތިންވަނަ ގައެވެ.

މި ހިނގާ އޮކްޓޫބަރު މަހުގެ ތެރޭގައި ދުވާލެއްގެ މައްޗަށް އެވްރެޖްކޮށް 5،333 ފަތުރުވެރިން ރާއްޖެއަށް ޒިޔާރަތްކުރަމުންދާ ކަމަށް ތަފާސްހިސާބުތަކުން ދައްކައެވެ. އަދި ފަތުރުވެރިން އެވްރެޖްކޮށް ރާއްޖޭގައި ހޭދަކުރަނީ ހަފުތާއެއްހައި ދުވަސް ކަމަށްވެސް ތަފާސް ހިސާބުތަކުން ފާހަގަކުރެވެ އެވެ.

ފަތުރުވެރިކަން