ސަޕްލިމެންޓަރީ ބަޖެޓަށް ފަސް ބިލިއަން ރުފިޔާ ހުށަހަޅައިފި

ދައުލަތުގެ ޚަރަދުތައް ހަމަޖެއްސުމަށް އިތުރު 5 ބިލިއަން ރުފިޔާގެ ސަޕްލިމެންޓްރީ ބަޖެޓެއް ރައްޔިތުންގެ މަޖިލީހަށް ހުށަހަޅައިފި އެވެ.

ފިނޭންސް މިނިސްޓަރު މޫސާ ޒަމީރު މިއަދު މަޖިލީހަށް ހުށަހެޅުއްވި މި ބަޖެޓަކީ ޕީއެސްއައިޕީ މަޝްރޫއުތައް ހިމެނޭހެން ދައުލަތުގެ ހިންގުމުގެ ޚަރަދުތައް ހަމަޖައްސައި ސަރުކާރު ހިއްސާވާ ކުންފުނިތަކަށް ދޫކުރާ ފައިސާ ހަމަޖެއްސުމަށް ހުށަހެޅި ބަޖެޓެކެވެ.

ބަޖެޓު ހުށަހަޅުއްވަމުން ފިނޭންސް މިނިސްޓަރު ޒަމީރު ވިދާޅުވީ މި އަހަރަށް ފާސްކޮށްފައިވާ ބަޖެޓަކީ ނިމިދިޔަ ސަރުކާރުން އެކުލަވާލާފައިވާ ބަޖެޓެއް ކަމަށާއި ރައީސް މުހައްމަދު މުއިއްޒުގެ ސަރުކާރުގެ ތަސައްވުރާއި ވިސްނުނުން ބަޖެޓުގައި ފުރިހަމައަށް ހިމެނިފައި ނެތް ކަމަށެވެ.

މިއަދު ހުށަހެޅި ސަޕްލިމެންޓްރީ ބަޖެޓުގައި ޕީއެސްއައިޕީ މަޝްރޫއުތަކަށް 2 ބިލިއަން ރުފިޔާ، އެސްއޯއީތަކަށް 441.1 މިލިއަން ރުފިޔާ، ކޮންޓިންންޖެންސީ ބަޖެޓަށް އިިތުރު 650 މިލިއަން ރުފިޔާ، ސްޓޫޑެންޓު ލޯނު ދޫކުރުމަށް 458 މިލިއަން ރުފިޔާ، މެޑިކަލް ކޮންސިއުމެބަލްސްއަށް 200 މިލިއަން ރުފިޔާ، ބޭސް ފަރުވާގެ އެހީއަށް 262.6 މިލިއަން ރުފިޔާ، ސަބްސިޑީއަށް 1.02 ބިލިއަން ރުަން ރުފިޔާ އަދި މުސާރައާއި އުޖޫރައަށް 24.4 މިލިއަން ރުފިޔާ ހިމަނާފައިވެއެވެ.

ފިނޭންސް މިނިސްޓަރު ޒަމީރު ވިދާޅުވީ ޕީއެސްއައިޕީގެ މަޝްރޫއުތަކަށް 2 ބިލިއަން ރުފިޔާ ހިމަނާފައިވަނީ އެ މަޝްރޫއުތައް ހުއްޓުމެއްނެތި ކުރިއަށް ގެންދިއުމަށް ކަމަށެވެ. މި ފައިސާއަކީ ފާއިތުވި އަހަރުގެ ބިލުތަކަށް ފައިސާ ދެއްކުމަށާއި، އަލަށް ފަށާފައިވާ ބޮޑެތި މަޝްރޫއުތަކުގެ ދުވެލި އަންދާޒާކުރި މިންވަރަށްވުރެ ބާރަށް ހިނގާފައިވާތީ އެ މަޝްރޫއުތަކަށް ފައިސާ ދެއްކުމަށާއި، ހޭދަވާނެކަމަށް ލަފާކުރެވޭ ވަރަށްވުރެ ކުޑަ އަގުތައް ހިމަނައިގެން ބަޖެޓުގައި ހިމަނާފައިވާ މަޝްރޫއުތައް ކުރިއަށްގެންދަން ބޭނުންވާ ޖާގަ ހޯދުމަށް ކަނޑައަޅާފައިވާ އަދަދެއް ކަމަށް މިނިސްޓަރު ވިދާޅުވިއެވެ.

މިނިސްޓަރު ޒަމީރު ވިދާޅުވީ މި އަހަރުގެ ބަޖެޓު ފާސްކުރި އިރު މި އަހަރަށް 60 ބިލިއަން ރުފިޔާ ހިނގާނެކަން އެނގެން އޮތް ކަމަށާއި، މިދިޔަ މަހުގެ ނިޔަލަށް ބަޖެޓުގެ 74 އިންސައްތަ ވަނީ ހޭދަވެފައި ކަމަށެވެ. ސަޕްލިމެންޓްރީ ބަޖެޓު ހުށަހަޅުއްވަމުން ފިނޭންސް މިނިސްޓަރު މޫސާ ޒަމީރު ވިދާޅުވީ ސަޕްލިމެންޓަރީ ބަޖެޓަށް ބޭނުންވާފައިސާ ހޯދުމަށް ރާވާފައިވަނީ ޕްރޮޖެކްޓް ލޯނުތަކުންނާއި، ރާއްޖޭގެ ފަރާތްތަކުން ލޯނު ހޯދައިގެން އަދި ޓީ ބިލު ވިއްކައިގެން ކަމަށެވެ.

"މިގޮތުން މި ސަޕްލިމެންޓަރީ ބަޖެޓު ފައިނޭންސްކުރަން ރާވާފައިވަނީ ބޭރުގެ ފަރާތްތަކުން 1 ބިލިއަން ރުފިޔާ، އަދި އަދި ރާއްޖޭގެ ފަރާތްތަކުން 3 ބިލިއަން ރުފިޔާ ހޯދައިގެން،" ޒަމީރު ވިދާޅުވިއެވެ.

 

ސަޕްލިމެންޓަރީ ބަޖެޓާއެކު، މި އަހަރުގެ ބަޖެޓުގެ ޖުމުލަ އަދަދު 55 ބިލިއަން ރުފިޔާއަށް އަރާނެއެވެ. ސަޕްލިމެންޓަރީ ބަޖެޓުގެ އާމްދަނީ ހިމަނައިގެން އާމްދަނީއާއި ހިލޭ އެހީގެ ގޮތުގައި ލިބޭނެކަމަށް ލަފާކުރަނީ 34 ބިލިއަން ރުފިޔާއެވެ. ސަޕްލިމެންޓަރީ ބަޖެޓުގެ އޯވަރޯލް ޑެފިސިޓަކީ 4 ބިލިއަން ރުފިޔާއެވެ.

މި އަހަރުގެ ބަޖެޓުގެ ޑެފިސިޓް، މި ސަޕްލިމެންޓަރީ ބަޖެޓާއެކު އިތުރު 18 ބިލިއަން ރުފިޔާއަށް އިތުރުވާނެއެވެ. މިއީ، އުފެއްދުންތެރިކަމުގެ ނިސްބަތުން 16 އިންސައްތައެވެ. އަހަރު ނިމޭއިރު ދައުލަތުގެ ދަރަނި ހުންނާނީ އުފެއްދުންތެރިކަމުގެ ނިސްބަތުން 118 އިންސައްތައިގައި ކަމަށް ލަފާކުރެވެއެވެ.

މި ސަޕްލިމެންޓަރީ ބަޖެޓަކީ ދައުލަތުގެ ޚަރަދުތައް ހަމަޖެއްސުމަށާއި، ރައީސް މުޙައްމަދު މުޢިއްޒުގެ ސަރުކާރުގެ ސިޔާސަތުތައް ތަންފީޒުކުރުމަށް މުހިންމު ބަޖެޓެއް ކަމަށް ފިނޭންސް މިނިސްޓަރު ޒަމީރު ވިދާޅުވެފައިވެއެވެ. މި ބަޖެޓު ފާސްވުމުން، ސަރުކާރުގެ މަޝްރޫޢުތަކާއި ޚިދުމަތްތައް މެދުނުކެނޑި ކުރިއަށް ގެންދިއުމަށް މަގުފަހިވެގެންދާނެ ކަމަށް ބެލެވެއެވެ.